Mga kandidata sa Mrs. Cebu Philippines 2026, gipaila na!

CEBU, Philippines — Gipaila na ang 14 officials candidates  sa Mrs. Cebu Philippines 2026 atol sa ilang sashing ceremony ug press presentation niadtong Domingo, nga gipahigayon sa  Cebu Parklane International Hotel.

Nitambong usab sa maong kalihokan ang nangagi nga mga mananaog sa maong indigay .

Nagpanikad na ang mga kandidata sa paglangkat sa  titulo nga Mrs. Cebu Philippines. Ang maong korona kay kasamtangang gihuptan ni Nika Linz Harris, nga morepresentar sa Pilipinas sa Mrs. International Global 2026 sa Malaysia karong Oktubre.

Ang 14 ka kandidata sa Mrs. Cebu Philippines 2026  kay  sila si Anna Marie Livera (Compostela), Lei Bernadette Paguntalan (Minglanilla), Joan Ibarita (Cebu City-East), Ricarmelita Enconado (Cebu City-South), Kasandra Jhane Mangubat (Cebu City-North), Dana Nicole Rosales (Carcar City), Mimie Marie Tan Juan (Mandaue City), Janice Schlaucher (Talisay City), Genesa Bustillo (Santander), Elizabeth Flores (Mandaue City-East), Dianne Lopez (Samboan), Lyka Decipolo (Toledo City), Marjie Sarcol (Liloan), ug Rhebecca Marie Osorio (Dalaguete).

Mahitabo ang coronation night karong  Nobyembre 27 sa Waterfront Cebu City Hotel and Casino.

Labaw pa sa korona, ang tumong sa maong indigay  mao ang  paghatag og mas lawom nga plataporma alang pagpakita sa kababaenhan sa ilang abilidad sa paghimo og positibong kausaban sa ilang komunidad.

Natawo ang Mrs. Cebu-Philippines gikan sa panan-aw nga ang matag babaye adunay kaugalingong istorya, katuyoan ug katungod .

Padayon usab nga gisaulog sa Mrs. Cebu Philippines pageant  ang katahom, pagka-indibidwal ug mga kalampusan sa  babaye, dili lamang isip  reyna sa entablado, kondili isip mga babayeng makahatag og inspirasyon, gahum ug makahuloganong kontribusyon sa katilingban.

Adbokasiya ni Jona

Nakadawat og mga pagdayeg ang Kapamilya singer nga si Jona tungod sa iyang pagdala sa iyang adbokasiya  alang sa mga hayop ngadto sa iyang umaabot nga concert.Gipahibalo ni Jona nga ang iyang benefit  concert kay dili lamang alang sa musika, kundili makatabang usab sa mga programa alang sa   iro ug iring. Mahitabo  ang concert karong  Nobyembre 14 sa New Frontier Theater sa Quezon City, usa ka adlaw sa dili pa ang  ika-37 nga birthday ni Jona.

Lakambini nadakpan na

Gisikop na  sa kapulisan sa Quezon City sa niaging adlaw si Lakambini Chiu , ang igsoong babaye sa aktres nga si Kim Chiu tungod sa kasong qualified theft . Gidakop si Lakambini pinaagi sa warrant of arrest nga giisyu sa Quezon City Regional Trial Court (RTC) Branch 84.Nagsugod ang kaso human nisang-at si Kim og criminal complaint batok sa iyang igsoong babaye niadtong Disyembre sa niaging tuig kay  nadiskobrehan niini ang kuwestiyonable  nga  pinansyal nga rekord sa ilang negosyo.

Wala maapil

Wala ra’y  problema alang kang “Star for All Seasons” Vilma Santos ang wala pagkalakip sa iyang pangalan sa gideklarang National Artists sa Pilipinas. Dako ang iyang pagtoo nga kung gitakda alang kaniya ang usa ka butang, mahitabo kini sa hustong panahon.Kini ang iyang tubag sa mga diskusyon sa mga Vilmanians ug ubang supporters kung nganong wala siya maapil sa bag-ong batch sa National Artists.

JoshLia, moatubang  sa pagsulay sa gugma ug panahon

Mosulay  sa kusog sa gugma, kapalaran ug panahon ang magka- loveteam  nga sila Joshua Garcia ug Julia Barretto sa ilang bag-ong pelikulang “Always Yours, Never Mine.”

Gidala nila ang istorya nila Apollo ug Luna sa romantic drama movie  sa Star Cinema nga  ubos sa direksiyon ni Cathy Garcia-Sampana.

Ang pelikula naghisgot sa gugma nga molungtad sulod sa tulo ka dekada, diin makita ang mga karakter sa lain-laing hugna  ug panahon sa ilang kinabuhi.

Suma pa  sa scriptwriter niini  nga si Vanessa R. Valdez, usa sa pangutana nga mahimong mapamalandongan sa mga manan-aw mao kung ang ilang paghigugma sa usa ka tawo mahimong makapugong  sa pagkamatinud-anon niini sa kaugalingon.

Dugang pa niya, dili lamang kini istorya sa gugma kundili istorya usab sa kinabuhi ug  mga mga naumol nga desisyon .

Nalakip  usab sa cast sila Bianca Umali, Chandra Romero, Joy Barcoma, Bob Jbeili, Karen Reyes, Migs Almendras, Paulo Angeles, Ina Raymundo, Franco Laurel, Reign Parani ug Jan Silverio.

Ipasalida ang “Always Yours, Never Mine” sa mga sinehan sa Pilipinas sugod karong September  30.

Ipasalida usab kini sa nagkalain-laing nasud , lakip ang UAE, Qatar, Bahrain, Australia, New Zealand, United States, Canada, Guam, United Kingdom, Austria, Spain, France ug Italy.

Sandro, mitubag na sa  reklamo batok sa iyang amahan

Mitingog  na si Sandro Muhlach bahin sa mga reklamo batok sa iyang amahan nga si Niño Muhlach nga may kalabotan sa aksidente sa Antipolo City.Sa episode sa KALURKS!  sa niaging adlaw , gihimakak  ni Sandro ang taho nga matud gipasagdan sa ilang pamilya ang biktima sa aksidente nga gikalambigitan sa   iyang amahan.

Suma  ni Sandro, siya mismo ang unang gitawagan ni Niño pagkahitabo sa insidente ug giasikaso ang panginahanglanon sa mga biktima . Tungod niini, nahibulong siya nganong miingon ang biktima nga gipasagdan lang sila .

Nagkanayon ang aktor nga  gidala pa nila ang biktima sa pribadong hospital ug gibayran ang hospital fees nga niabot  og P116,000.

“Kasi, sila rin may mali. Gusto nilang mapalitan ’yung motor. Pero unang-una, hindi nila maipakita ’yung mga papeles na kailangan, mga insurance and everything. Wala silang ganoon,” suma pa  ni Sandro . Ang pagpaalim sa  biktima maoy prayoridad sa pamilya ni Niño niadtong higayona , ug nahibulong sila nga ang motor dayon ang gihuna- huna niini.

“Kasi, kakalabas lang niya ng ospital, siyempre, hindi pa siya magaling. Gusto niya agad ng motor. Ang focus namin is siyempre ’yung mapagaling muna siya,” dugang pa ni Sandro .

Suma pa ni Sandro, nangayo na  og pasaylo ang biktima nga nibuhi og daotang istorya batok kang Niño. Apan wala kini gidawat sa iyang stepmom nga si Diane Abby Tupaz . Kahinumdoman nga niadtong  Agosto, nalambigit sa usa ka aksidente ang sakyanan nga gimaneho ni Niño. Tulo ka establisemento ang naigo sa sakyanan, lakip ang usa ka motorsiklo.

Cassy, special friend ni Iñigo

Gihulagway sa aktor nga si Iñigo Pascual ang aktres nga si  Cassy Legaspi isip iyang “special friend”  ug iya kining gipabuhagay human nitumaw ang mga pangutana gikan sa ilang fans kalabot sa ilang status.

Kahinumdoman nga nag-viral  online ang ilang sweet photos .

Suma pa ni Iñigo nga soud kaayo niya  si Cassy  ug usa kini sa mga sweet kaayo nga tawo nga iyang nailhan.