Tulo ka brgy sa siyudad sa Sugbo dunay kaso sa ASF

CEBU, Philippines — Misaka ang kaso sa African Swine Fever (ASF) diin tulo ka barangay sa Dakbayan sa Sugbo ang apektado.

Sa press conference kagahapon, Septiyembre 21, 2026, matud pa ni Kenneth Siasar kinsa Chief of Staff ni Mayor Nestor Archival nga base sa report sa Department of Veterinary Medicine and Fisheries (DVMF), pito na ka baboy ang nangamatay sukad sa miaging Domingo, Septiyembre 20.

Karong buwana misaka ang ihap sa mga baboy nga naapektuhan sa maong sakit. Aduna usab mga baboy nga gi-cull human nga gisuspetsahan nga mahimong nagdala sa virus.

Gibanabana nga kapin sa 50 ka baboy ang i-move out o gilahi ug gi-isolate gikan sa mga lugar nga adunay positibong kaso ilabina gikan sa pipila ka barangay gikan sa Toong, Buhisan, ug Pamutan.

Gipalawig usab sa kagamhanan ang isolation sa mga apektadong lugar. Nagbantay ang Bureau of Fire Protection (BFP) aron masiguro nga walay baboy nga makagawas sa maong mga lugar samtang gipadayon ang containment measures. Walay baboy nga tugotan nga makasulod o makagawas sa mga apektadong lugar isip kabahin sa pagpugong sa posibleng pagkaylap sa ASF.

Nakig-alayon usab ang kagamhanan sa Department of Engineering and Public Works (DEPW) alang sa gikinahanglang kahimanan sa pagkawot og yuta alang sa paglubong sa mga namatay nga baboy.

Samtang, padayon pa ang pagsubay sa DVMF kung asa gikan ang virus. Gitan-aw ni Siasar, posible usab nga natakdan ang ubang mga baboy tungod sa exposure sa mga naapektuhan nga hayop.

Gipahugtan usab sa DVMF ang biosecurity measures ug surveillance sa mga lugar nga naapektuhan aron mapugngan ang dugang pagkaylap sa virus. (BANAT NEWS)