Data-data nga pagbayad sa kuryente gihangyo sa konseho sa Mandaue

CEBU, Philippines — Gipangayo sa Mandaue City Council ang staggered payment scheme alang sa mga konsumidor nga naapektuhan sa pagsaka sa presyo sa kuryente sa August ug September 2026 billing cycles.

Ang resolusyon, nga gipangamahanan ni Councilor Jennifer del Mar, naghangyo sa Visayan Electric Company (VECO) nga tugotan ang mga konsumidor nga hinay-hinayon og bayad ang ilang August ug September bills hangtod December 2026, nga walay penalties o disconnection sa serbisyo sa kuryente.

Gi-aprobahan ang maong resolusyon atol sa regular session sa konseho kagahapon Septiyembre 21, 2026.  Matud ni Del Mar, misaka ang gasto sa kuryente sa panahon nga nag-atubang na daan og lain-laing kalisdanan sa ekonomiya ang mga konsumidor, nga nakaapekto sa ilang pag-budget alang sa mga panginahanglanon sa panimalay ug negosyo.

Matud sa konseho, ang paghatag og dugang panahon sa pagbayad makatabang sa mga konsumidor nga ma-adjust ang ilang budget sa panimalay o negosyo ug malikayan ang penalties ug pagkaputol sa serbisyo.

Matud ni Del Mar, gipili ang December tungod usab kay daghang mga trabahante ang makadawat sa ilang Christmas bonus nianang bulana.

Mitambong sa regular session sa konseho si VECO Marketing and Communications Manager Erik Monsanto ug mitubag sa mga pangutana sa mga konsehal.

Matud ni Monsanto sa usa ka interbyu, wala sa VECO ang awtoridad sa pagtino sa payment arrangement nga gisugyot sa konseho, apan mahimo gihapon nga i-lobby sa konseho ang maong proposal.

Giingon ni Monsanto nga miabot na sa P14.96 kada kilowatt-hour ang kasamtangang electricity rate.

Giingon ni Monsanto nga gi-defer sa VECO ang pipila ka gasto niini atubangan sa Energy Regulatory Commission (ERC), hinungdan nga napabilin sa P14.96 kada kilowatt-hour ang rate.

Matod niya, usa sa hinungdan sa pagsaka sa presyo mao ang kakulang sa electricity supply, nga nagpugos sa VECO nga mokuha og dugang kuryente gikan sa Wholesale Electricity Spot Market (WESM), diin ang presyo nag-agad sa merkado. Ang VECO mopalit og kuryente pinaagi sa WESM pinaagi sa pag-bid ug pagkuha og power gikan sa independent power producers.

Matud ni Monsanto, naghimo usab og mga lakang ang VECO aron mapagaan ang epekto sa pagsaka sa rates pinaagi sa deferment sa pagbayad.

Apan gipasabot ni Monsanto nga dili makahimo ang VECO og kaugalingong desisyon bahin sa staggered payment arrangement nga gisugyot sa Mandaue City Council. Apan mahimo silang mohangyo sa ERC alang sa payment deferment nga kinahanglan aprubahan sa regulatory agency.

Sa pagkakaron, matud ni Monsanto, adunay moratorium ang ERC sa disconnection hangtod Nobiyembre karong tuiga, nga nagtugot sa pag-defer sa pagbayad sa electricity bills ug dili dayon ma-disconnect ang mga konsumidor. (BANAT NEWS)