12 ka tonelada nga basura nakolekta sa cleanup
CEBU, Philippines — Kapin 12 ka toneladang basura ang nakolekta sa mga baybayon sa Lapu-Lapu City atol sa pag-apil sa siyudad sa International Coastal Cleanup (ICC) 2026 niadtong Sabado, Septiyembre 19.
Base sa consolidated report sa Department of Environment and Natural Resources Central Visayas (DENR-VII) ug City Environment and Natural Resources Office (CENRO), mikabat sa 12,334.40 ka kilo ang kinatibuk-ang nakolektang basura, katumbas sa 1,779 ka sako sa nagkalain-laing klase sa basura.
Miabot sa 6,800 ka volunteers gikan sa 91 ka partner organizations ug institutions ang miapil sa simultaneous cleanup activities sa 15 ka designated coastal areas sa mainland ug sa mga island barangay sa Olango, Pangan-an, Caohagan ug Caubian.
Apil usab sa kalihokan ang Scubasurero underwater cleanup diin 100 ka volunteer divers ang nanglimpyo ug nangolekta sa mga marine debris sa kadagatan.
Kadaghanan sa nakolektang basura mga single-use plastics.
Ang pinakadaghan mao ang food wrappers nga mikabat sa 12,747 ka piraso, gisundan sa ubang plastic bags nga 6,841; plastic grocery bags nga 6,584; plastic beverage bottles nga 5,666; ug beverage sachets o pouches nga 4,520.
Nakolekta usab ang 4,383 ka plastic cups ug plates, 3,551 ka plastic bottle caps, 3,463 ka plastic food containers, 3,096 ka plastic ug foam pieces, ug 2,813 ka plastic sachets sama sa detergent ug shampoo sachets.
Matud ni CENRO Officer-in-Charge Jocelyn Abayan, mas dako ang volume sa basura nga nakolekta karong tuiga kumpara sa miaging tuig.
Iyang gipasalig nga ipadayon usab sa CENRO ang pagpatuman sa mga regulasyon batok sa single-use plastics ug sa city waste management ordinance, lakip ang pagpalig-on sa waste segregation, ilabi na sa mga coastal barangay.
Gipahigayon ang cleanup sa pakigtambayayong sa DENR Region VII, Ocean Conservancy, International Coastal Cleanup Philippines ug uban pang environmental groups ug organizations. (BANAT NEWS)
- Latest
