Serbisyo alang sa national ID bukas sulod sa 24 oras

CEBU, Philippines — Abli sulod sa 24 oras ang mga serbisyo alang sa national ID sulod sa Cebu City 24/7 Government Services Hub gikan Septiyembre 21 hangtud sa 26, 2026.

Gipahibalo kini sa Philippine Statistics Authority (PSA) Cebu Provincial Statistical Office nga adunay overnight shift aron masiguro ang padayon nga operasyon sa unom ka adlaw nga serbisyo nga molungtad gikan alas 11:00 sa gabii hangtud alas 6:00 sa buntag aron walay paghunong ang paghatag sa mga serbisyo sa national ID.

Ang 24/7 nga serbisyo ipahigayon sa Cebu Exchange Tower sa Salinas Drive, Barangay Lahug niining siyudad atbang sa Cebu I.T. Park.

Ang mga serbisyo nga ihatag first-come, first-served basis kini sa tibuok 24 oras nga operasyon sama sa pagparehistro alang sa national ID, pag-update o pag-usab sa demographic information, pag-isyu sa paper format sa national ID o ePhilID, pagkuha sa Transaction Reference Number (TRN) lakip na ang pagtubag sa mga pangutana o ubang kabalaka kabahin sa national ID.

Giawhag ang mga aplikante nga magdala og balidong dokumento alang sa ilang transaksiyon sa national ID.

Alang sa registration, ang mga dokumento nga gikinahanglan gilangkuban sa PSA issued Certificate of Live Birth, Philippine Passport o ePassport nga giisyu sa Department of Foreign Affairs (DFA), Unified Multi-Purpose Identification (UMID) Card nga giisyu sa Government Service Insurance System (GSIS) o Social Security System (SSS) o Student’s License Permit o non-professional/professional driver’s license nga giisyu sa Land Transportation Office (LTO). — /BDB (BANAT NEWS)