Metro Cebu air quality nibalik sa acutely unhealthy

CEBU, Philippines —  Misamot na usab ang pagkadaot sa kalidad sa hangin sa Metro Cebu, kagahapon, Sept. 19, diin misaka sa 264 ang Air Quality Index (AQI), nga giklasipikar nga “acutely unhealthy,” taliwala sa padayong transboundary haze nga gikan sa mga sunog sa kalasangan sa Indonesia.

Natala sa Environmental Management Bureau Region VII ) ang AQI nga 264 sa monitoring station niini sa Metro Cebu pasado alas-11 sa buntag kagahapon.

Ang pinakabag-ong reading dakong pag-usab kumpara sa pag-ayo sa kalidad sa hangin nga nasinati sayo ning semanaha, diin ang AQI sa Metro Cebu giklasipikar nga “fair.”

Niadtong Sept. 16, ang Metro Cebu monitoring station nakarekord og AQI nga 57, nga giklasipikar nga “fair,” samtang ang Barangay Cabitoonan monitoring station sa Toledo City nakarekord og 17, nga “good.”

Apan niadtong Sept. 18, misamot pagdaot ang kalidad sa hangin sa Metro Cebu, diin misaka ang AQI sa 146 alas-11 sa gabii, nga giklasipikar nga “unhealthy for sensitive groups.” Sa Toledo City, ang AQI alas-11 sa gabii sa Sept. 18 kay 33, nga “good.” Apan misaka kini sa ulahi ngadto sa 103, nga giklasipikar nga “unhealthy for sensitive groups.”

Gipakita sa mga naunang monitoring kung unsa kapaspas ang pag-usab-usab sa kalidad sa hangin ning bulana. Ang AQI sa Metro Cebu niabot sa 173, o “very unhealthy,” niadtong Sept. 1, sa wala pa misamot ngadto sa 251, o “acutely unhealthy,” niadtong Sept. 3.

Matud sa EMB-7, padayon nilang gibantayan ang lokal nga ambient air quality samtang nakaapekto sa rehiyon ang transboundary haze gikan sa mga sunog sa Indonesia.

Gipunting usab sa EMB-7 sa una ang taas nga lebel sa fine particulate matter o PM2.5 isip usa sa mga gikabalak-an atol sa haze episode.

Ang mga adunay sakit sa kasingkasing o respiratoryo, lakip na ang adunay asthma, gitambagan nga magpabilin sa sulod sa balay ug mopahulay kutob sa mahimo.

Giawhag ang publiko nga padayon nga mosubay sa opisyal nga air quality advisories ug updates gikan sa EMB-7 tungod kay mahimong mausab ang kondisyon depende sa paglihok sa haze ug sa prevailing weather conditions. (BANAT NEWS)