Mga pasilidad sa gobyerno butangan og EV charging station

CEBU, Philippines —  Gitan-aw sa Probinsiya sa Sugbo ang mga strategic government facilities sama sa mga bus terminal ug provincial hospitals isip mga lokasyon sa mga electric vehicle (EV) charging stations ubos sa bag-ong ordinansa nga gipasar na sa ikatulong ug kataposang pagbasa sa Hunta Probinsiyal.

Ubos sa ordinansa nga gipangamahanan ni Board Member Stanley S. Caminero, gitumong ang pagtukod sa Cebu Provincial Green Mobility Roadmap ug EV Charging Network sa probinsya. Lakip sa giila nga priority sites ang Cebu South Bus Terminal, Cebu North Bus Terminal ug ang tanang provincial hospitals nga gidumala sa Cebu Provincial Government.

Gipasar sa Provincial Board ang maong ordinansa sa regular session niini niadtong Lunes, Septiyembre 14, 2026. Ubos sa Phase I sa programa, ang kasamtangan ug umaabot nga mga pasilidad sa provincial government pagahatagan og publicly accessible charging stations, ilabina sa mga lugar nga adunay kalambigitan sa public transport, health services ug frontline services.

Apil usab sa mga posibleng lokasyon ang Capitol compounds, provincial transport terminals, sports complexes, tourism gateways, government motor pools, government-owned parking facilities, provincial educational institutions ug uban pang strategic public service centers.

Gidasig usab sa ordinansa ang component cities ug municipalities nga magbutang og labing menos usa ka publicly accessible EV charging station sa usa ka strategic government facility sulod sa usa ka tuig gikan sa pagkahimong epektibo sa ordinansa.

Dunay initial nga P20 milyon nga pundo aron masugdan ang pagtukod sa dual charging stations, lakip ang fast direct-current (DC) ug standard alternating-current (AC) charging units sa Capitol Compound, North ug South Bus Terminals ug uban pang angay nga lugar. Lahi-lahi usab ang charging arrangements depende sa mogamit niini. Ang private EV owners pabayron sa full commercial rate, samtang ang provincial government employees hatagan og diskwento nga labing menos 20 porsiyento.  Ang official government vehicles libre sa charging, samtang ang pipila ka utility EVs sama sa registered modern public utility vehicles ug electric tricycles mahimong hatagan og libre o subsidized charging.

Gimugna usab ang permanenteng Provincial Green Mobility Implementation and Oversight Committee nga motan-aw sa pagpatuman sa programa, lakip ang paghimo sa implementing rules and regulations sulod sa 90 ka adlaw gikan sa effectivity sa ordinansa, pagtakda sa technical standards, tariff formulas ug connector specifications. (BANAT NEWS)