Perya ng mga aklat: Pagbabasa buhay pa rin

Makatawag-pansin din ang katatapos na limang araw na Manila International Book Fair (MIBF) sa SMX Convention Center Manila sa Pasay City. Hindi man agad masasabi kung ilan ang eksaktong dumalo, malinaw na hindi nawawala ang interes ng mga Pilipino sa mga aklat.

May mga bagong labas na aklat, mayroon ding mga naunang nailathala. May mga nobela, koleksiyon ng mga sanaysay, tula at maikling kuwento, mga aklat tungkol sa kasaysayan, kultura at lipunan, mga librong pang-edukasyon at pang-agham, pati mga pambatang aklat. May mga book launching, author signing, talakayan at iba pang aktibidad na may kaugnayan sa mga aklat at pagbabasa. Tila isang malaking perya nga ito ng mga aklat na taon-taon ay binabalikan ng mga mambabasa. Ipinakikita nitong marami pa ring tao na interesado sa mga aklat at handang gumugol ng oras at pera para sa pagbabasa.

Mahalagang bagay ito sa panahong napakaraming ibang pinagkakaabalahan ng mga tao. Nariyan ang cellphone, social media, streaming video, online games at iba pang anyo ng digital entertainment. Ngunit hindi nangangahulugan iyon na tuluyan nang nawawala ang pangangailangan sa tradisyonal na aklat.

Hindi lahat ng aklat na makikita sa isang book fair ay basta-basta mahahanap sa internet. Marami sa mga ito ang walang digital format o hindi available nang buo online. Ganito rin sa artificial intelligence. Maaaring makatulong ang mga AI system gaya ng ChatGPT at Gemini sa paghahanap o pagpapaliwanag ng impor­masyon, depende sa mga source na maaari nilang ma-access. Pero hindi nangangahulugang alam nila ang buong nilalaman ng bawat aklat na nakikita sa isang book fair. Kung ang isang libro ay hindi na-digitize at walang accessible na digital copy o ibang mapagkakatiwalaang source tungkol dito, hindi basta-basta makukuha ng AI ang buong nilalaman nito.

Nagbabago lamang ang paraan ng paglalathala at pagbebenta ng mga aklat. Bukod sa mga bookstore at book fair, maaari na ngayong bumili ng libro sa mga online store at marketplace. Mayroon ding e-books at iba pang digital editions na maaaring basahin sa cellphone, tablet o computer. Hindi naman kailangang mamili sa pagitan ng printed book at digital book. Pareho silang bahagi ng nagbabagong mundo ng pagbabasa.

Sa rami ng pagbabago sa teknolohiya, magandang makita na may mga taong patuloy pa ring naghahanap ng libro, nagbabasa at bumibili ng mga aklat.

Maaaring nagbago na ang paraan ng pagbabasa. Maaaring nagbago na rin ang anyo ng libro at ang paraan ng pagbili nito. Pero ang pangangailangan ng tao sa kuwento, kaalaman at mga ideya ay nananatili.

Kaya habang may mga taong pumapasok sa isang book fair o book store at naghahanap ng librong iuuwi, may dahilan pa rin para sabihing buhay pa ang pagbabasa.

••••

Email- [email protected]