Lapu-Lapu City Fiesta League 2026 miarangkada na

CEBU, Philippines — Pormal nang giablihan sa lokal nga kagamhanan sa dakbayan sa Lapu-Lapu, pinaagi sa Lapu-Lapu City Sports Commission, ang Lapu-Lapu City Fiesta League 2026 didto sa Hoops Dome sa Barangay Gun-ob niadtong Domingo, Septiyembre 13. Mitambong sa pormal nga seremonyas sa pagbukas si kongresista Junard “Ahong” Chan, uban nila sports committee chairman Janvi de la Serna ug sports commissioner Vince Carungay.

Kumbatihan sa tinuig nga liga ang nagkalain-laing matang sa paugnat sa kusog sama sa basketball, volleyball, pickleball, boxing, sepak takraw, tennis, table tennis, soccer, cycling, chess, skateboarding, darts ug airsoft.

Pinaagi ning mas lapad nga programa, ang mga atleta sa nagdaiyang edad ug lebel sa abilidad mahatagan og kahigayonan nga makaapil ug morepresentar sa tagsa-tagsa nila ka komunidad.

Ubos sa pagpangulo ni Mayor Cindi King-Chan, gipasalig pag-usab sa kagamhanan sa dakbayan ang pagpalig-on sa grassroots sports ug paghatag og mas daghang oportunidad sa mga Oponganon nga masalmot sa sports ug mga kalihokan sa komunidad.