‘Unexplained wealth’, puwedeng ikasibak ng opisyal - Cabotaje-Tang
MANILA, Philippines — Inihayag kahapon ni dating Sandiganbayan Presiding Justice Amparo Cabotaje-Tang na ang pagkakaroon ng hindi maipaliwanag na yaman ng isang pampublikong opisyal ay maaaring maging batayan para sa kanyang pagkakatanggal sa puwesto.
Sa ika-24 na araw ng impeachment trial, nagbigay ng testimonya si Tang sa impeachment trial ni Vice President Sara Duterte kung saan iniharap siya bilang eksperto sa public accountability at mga batas laban sa katiwalian, kabilang ang Anti-Graft and Corrupt Practices Act, Civil Forfeiture Law, at batas na sumasaklaw sa Statements of Assets, Liabilities and Net Worth (SALNs).
Sinabi ni House prosecutor at Akbayan party-list Rep. Chel Diokno na iniharap ng prosekusyon si Tang bilang testigo upang mabigyan ang mga senador-hukom at publiko ng legal na balangkas kung paano sinusuri ng anti-graft court ang mga ebidensiyang may kinalaman sa mga ari-ariang nakuha ng mga pampublikong opisyal habang nasa kanilang posisyon.
Bagaman at tinutulan ng defense panel ang pagharap ni Tang, nagpasiya si impeachment court presiding officer Sen. Francis Escudero na hindi tumetestigo si Tang tungkol sa mga partikular na alegasyong iniharap ng prosekusyon sa impeachment case laban kay Duterte.
Sa kanyang direct examination, sinabi ni Tang na ang isang pampublikong opisyal na mapatunayang may hindi maipaliwanag na yaman ay maaaring humantong sa kanyang pagkakatanggal o pag-dismiss alinsunod sa umiiral na mga batas laban sa katiwalian.
Kinumpirma rin ni Tang na ipinapalagay na ilegal na nakuha ang ari-arian ng isang pampublikong opisyal kung mapapatunayang nakuha ito habang nanunungkulan na hindi naman “proportion” sa kanyang suweldo bilang public officer o empleyado.
Nilinaw naman ni Tang na ang presumption na ilegal na nakuha ang isang ari-arian ay hindi nangangahulugan na awtomatiko nang guilty ang isang tao sa isang krimen.
- Latest
