Mga Oponganon gidasig nga makat-on og CPR

CEBU, Philippines —  Gidasig ang mga Oponganon nga makat-on sa basic hands-only cardiopulmonary resuscitation (CPR) aron mas daghang ordinaryong tawo ang mahimong unang makatabang kung adunay mahitabo nga cardiac emergency.

Kini ang mensahe ni Lapu-Lapu City Council Committee on Health Chairperson Dr. Emilio Galaroza Jr. atol sa Sagip CPR training nga gihimo niadtong Sabado, Sept. 12, sa Lapu-Lapu City Hoops Dome.

Sumala ni Galaroza, importante nga ang mga tawo adunay kahibalo ug kumpiyansa sa pagresponde sa emerhensya samtang naghulat sa pag-abot sa professional emergency responders.

“A person who knows what to do can make a difference between life and death,” matud niya. “Mao nga importante kaayo ang hands-only CPR. Pinaagi sa hustong chest compression, mahimo natong matabangan ang pagpadayan sa pag-agos sa dugo ngadto sa utok ug ubang importanteng organs, samtang naghulat ug nagpaabot kita sa mga emergency responders,” dugang pa niya.

Gipasabot usab ni Patrick Laraga, corporate communications and public affairs head sa Bell-Kenz Pharma Inc., nga ang cardiac emergency mahimong mahitabo kang bisan kinsa ug bisan unsang orasa. “Lahat naman ito pwedeng mangyari kahit kanino. At the same time, hindi natin alam kung kailan mangyayari,” matud ni Laraga. Matud pa niya, importante ang papel sa mga bystander tungod kay mahimo silang makatabang sa biktima sa panahon nga wala pa makaabot ang mga emergency responder.

“The key is that, we as bystanders, we will be able to help. Nagkakaroon tayo ng confidence na tumulong kung alam natin kung paano tayo makakatulong,” matud niya.

Moabot 1,000 ka volunteers ang mitambong sa Sagip CPR training, lakip ang mga miyembro ug opisyal sa Philippine Coastwise Shipping Association (PCSA), seafarers ug vessel crew, city government personnel, barangay health workers, community organizations ug mga representante sa Persons with Disabilities Affairs Office.

Kabahin ang kalihokan sa Sagip CPR Nautical Highway, usa ka programa nga nagtumong sa paghatag og basic lifesaving skills ngadto sa mga tawo sa maritime sector diin usahay dili dayon maabot ang medical assistance.

Matud ni Laraga, dili kinahanglan nga medical professional ang unang motubag sa usa ka emerhensya, ilabina sa barko o laing lugar nga layo sa medical facilities.

Gitudlo sa training ang basic SAGIP steps, lakip ang pagsiguro una nga luwas ang palibot, pagsusi sa kahimtang sa biktima, pagtawag sa 911 o local emergency hotline ug pagpakuha og automated external defibrillator (AED).

Gipakita usab ang hustong pagbutang sa duha ka kamot sa tunga sa dughan ug paghimo og 100 hangtod 120 ka chest compressions kada minuto, ingon man ang hustong pagkabit sa AED pads ug pagsunod sa voice prompts niini samtang gipadayon ang CPR. Lapu-Lapu City mao ang ikatulong local government unit sa Cebu nga miapil sa Sagip CPR program human sa mga training nga gihimo sa Cebu City ug Mandaue City sa miaging duha ka bulan. Ang programa nagtumong nga mahatagan og hands-only CPR skills ang usa ka milyon ka Pilipino.

Gidasig ni Galaroza ang mga partisipante nga dili lang kutob sa training ang ilang nakat-onan, kondili ipaambit usab kini sa ilang pamilya ug komunidad.(BANAT NEWS)