Cokaliong mipaulbo og 39 puntos, CECABA All Stars 5-0 na

CEBU, Philippines —  Si Chester Cokaliong mipabuhagay  og 39 puntos sa dihang gipayaka na sab sa Cebu Eastern College Alumni Basketball Association (CECABA) All Stars ang Toyota Mandaue North, 111-101, aron inaton ang way pildi nilang ratsada ngadto sa lima ka duwa sa 1st Edgar Cokaliong Memorial Basketball Tournament nga gipaluyohan sa  Shell Pilipinas Corporation sa Don Edgar Stadium sa Cokaliong Tower.

Sa edad nga 65 anyos, dalaygon kaayo nga way pagbahar ang tinirahan ni Cokaliong sud sa korte.

Ang tinamod nga shipping tycoon mibomba sa Toyota Mandaue og 13 kw 3-pointers, pito niini iyang gitagak sa ikatulong kuwarter nga nakatabang pagpaburot sa labaw sa CECABA ngadto sa 18 puntos, 89-71, padung sa pinal nga 10 minutos.

Ang CECABA mipakgang dayon sa endgame rally sa Toyota Mandaue aron pagpreserba sa double-digit nilang kadaogan.

Si Dean Dy Teves miabag sa impresibong salida ni Cokaliong uban ang 23 puntos sa labing nindot niyang duwa ning torneyo.

Si Mark Eugene Bukiron mitali og 16 puntos samtang si BJ Zosa midugang og 12 puntos alang sa CECABA, nga mitikang ngadto sa usa na lang ka daog aron pagkumpleto og 6-0 sweep sa duha ka hugna nga eliminasyon.

Si Jason Estremos maoy nangu sa Totoya Mandaue uban ang 29 puntos.

Si Ken Estenzo mibulsa og 23 puntos, si Dionesio Espinosa mi-iskor og 21 samtang si Diether Soco mihipos og 18 puntos apan nahugno silang tanan kay ang Toyota Mandaue nahagba sa 2-2.

Sa wala pa ang eksplosibo niyang salida batok sa Toyota Mandaue, si Cokaliong nagkayo nang daan.

Miposa siya og walo ka tres dayon na ngadto sa pagkadlit og 24 puntos nga nahimong yawi sa CECABA pagbugha sa Monday Hoopers, 108-98.

Si Cokaliong milansang og lima ka tres sa ikatulong kuwarter sa dihang ang Easternians mihipos og nuybe puntos nga labaw, 78-69, nga ilang naprotektahan sa nahibiling bahin sa duwa.

Si Cokaliong nakakuha og dakong suporta gikan ni Paul Martin Gabatan uban ang 17 puntos ingon man ni Zosa bitbit ang 13 puntos.

Sila si Bukiron ug Karl Tiu nagkumbinar og 21 puntos sa balanseng ataki sa CECABA.

Si Raj Advani mikadlit og 22 puntos alang sa Monday Hoopers samtang si Roi Mata mitimbre og 20 puntos. Sila si Nario Salibay, Jamel Eriso ug Loling Abella nagkumboya'g  48 puntos apan nangaminghoy sila kay ang Monday Hoopers bokya pa gihapon human sa upat ka duwa.