Kampiyon sa Cebu Press Freedom Basketball masayran karon
CEBU, Philippines — Ang kulbahinam nga kampiyonato sa Cebu Press Freedom Basketball Tournament 2026 mahuman na karong adlawa (Domingo, Septiyembre 13) diha sa Cebu Eastern College (CEC) Gymnasium.
Magsugod ang kumbati sa alas 10:30 sa buntag.
Ang usa sa duha ka teams nga magtigi sa tinagakay nga Game 3 mao ang hiniusang pundok sa mga beat journalists nga nagkober sa Kapitolyo (CART) ug Kapolisan (DEPP) kauban ang mga photographers/cameramen (LENS).
Kaatbang nila ang kombinasyon sa mga mediamen nga nagkober sa City Hall (CHARM), Mandaue ug Lapu-lapu (ARMALITE), Cebu South (MICS) ingon man mga tigbalita sa sports ( SCORE) ug korte (MALLET).
Nahukman sa Cebu Press Freedom Week 2026 convenors nga duha ra ka teams ang pormahon nga magsangka sa usa ka best-of-three series.
Nagtabla ang serye basi sa resulta sa duwa sa miaging duha ka Domingo. Gituyo kining maong paugnat sa kusog aron kaabagan sa maayong panglawas ang mga tigbalita.
Laing katuyoan mao ang pagpahimsog pa sa relasyon ug panaghiusa sa kawsa ug krusada sa pagkagawasnon sa mga sakop sa prensa.
Mapasalamaton ang mga tigbalita sa Sugbo ug ang CPFW 2026 convenors ngadto sa mga sponsors ning maong torneyo, nila ni Chester Cokaliong, founder ug CEO sa Cokaliong Shipping Lines, tanang mga kadagkuan sa CEC nga pinangulohan nila ni Frederick "Eric" Ong III, School Director, Jefferson Go, Board of Trustee, ug John Maraat, Senior Liaison Officer.
- Latest
