Mans Carpio, planong gawing ‘hostile witness ‘ ng prosecution

MANILA, Philippines — Pinag-aaralan na ng House Prosecution Panel na gawing “hostile witness” sa impeachment trial ni Vice President Sara Duterte ang kanyang mister na si Atty. Manases Carpio.

Ito ang kinumpirma ni House Prosecutor Terry Ridon, na pinag-aaralan na ng prosecution kung magiging mahalaga ang testimonya ni Carpio para sa Article II ng impeachment complaint na tumutukoy sa hindi maipaliwanag na yaman ng Bise Presidente.

Ayon kay Ridon, maaaring ipatawag si Carpio kung lumabas ang pangalan nito sa mga financial record o bank accounts at mga dokumentong may kaugnayan sa mga alegasyon kay VP Sara.

Nilinaw ni Ridon na hindi pa kasama si Carpio sa kasalukuyang listahan ng mga testigo ng prosecution at wala pa silang pinal na desisyon sa usapin.

Nabatid na kabilang sa mga listahang isinama bilang witness stand ang mga opisyal at kinatawan mula sa mga bangko, Office of the Ombudsman, Bureau of Internal Re­venue, at Securities and Exchange Commission.

Inaasahang magbibigay ang mga ito ng mga record tungkol sa financial transactions, tax payments, at mga registered businesses ni VP Sara at ng kanyang asawa.

Sa ngayon, hawak na ng prosecution ang mga record sa mga bank accounts; corporate re­gistration; at ang AMLC report na may kaugnayan sa financial transactions ng Bise Presidente.