Bahay ng tserman sinuwag ng dump truck: 7 kritikal
COTABATO CITY, Philippines — Pito katao kabilang ang tatlong bata at truck driver ang malubhang nasugatan makaraang rumagasa ang isang dump truck at bumagga sa isang bahay sa Barangay Pigcalagan, Sultan Kudarat, Maguindanao del Norte nitong Miyerkules ng hapon.
Sinabi ng mga local executives at ng Sultan Kudarat Municipal Disaster Risk Reduction and Management Office sa mga mamamahayag kahapon na nawalan ng kontrol sa manibela si Almansor Panda matapos na pumalya ang makina ng truck na minamaneho nito.
Ayon naman kay Captain Steffie Salanguit, spokesperson of the Police Regional Office-Bangsamoro Autonomous Region, at ng mga imbestigador ng Sultan Kudarat Municipal Police Station na rumesponde sa lugar, nawasak ang bahay na pag-aari ni Barangay Pigcalagan Chairman Johnny Alamada Adting dahil sa pagsuwag ng nasabing dump truck.
Tatlo sa mga kamag-anak ni Chairman Alamada na kinilalang sina Noraisa, Norbaya at Israel, pawang may apelyidong Alamada; tatlo pang batang kapamilya nila, at ang truck driver ang nagtamo ng matinding sugat sa iba’t ibang bahagi ng kanilang katawan sa insidente. Lahat sila ay isinugod sa ospital para malapatan ng agarang lunas.
- Latest
