Bela, nabalaka sa exposure sa kabataan sa social media

CEBU, Philippines — Nipadayag  sa iyang dakong kabalaka  ang aktres nga si Bela Padilla bahin sa mga matang sa video ug impormasyon nga kasagaran nga makit-an ug makita sa  kabataan sa social media, ilabi na human sa mga sunod-sunod nga insidente sa mga tunghanan.

Sa paglugwa ni Bela sa bag-ong episode sa vlog ni Maricel Soriano,  usa sa mga nag-unang punto nga ilang nahisgutan mao ang pagahin sa kabataan og dakong oras sa internet .

“Nagwo-worry po ako sa generation ngayon, lalo ngayon ang dami nating nakikita na mga nangyayari sa schools na very violent, 'di ba?” ni Bela pa.

Gihatagan usab og pagtagad sa aktres ang paspas ug walay kontrol nga pagbalhin-balhin sa mga video nga makita sa mga bata samtang naggamit sila sa mga aplikasyon sama sa social media.

“Kapag nag-scroll ka, kahit sa Instagram lang, video ng asong sumasayaw. One minute, sumasaya ka. Next video, giyera. Mga batang putol-putol ang kamay. Na hindi dati natin napapanood sa TV,” saysay pa ni Bela. —SJA

Bag-ong episodes sa ‘SOCO’, makita na sa Free TV

Mga  bag-ong makalilisang nga istorya sa krimen ang idalit  sa batikang crime journalist nga si Gus Abelgas sa pagbalik sa ABS-CBN News docudrama nga "SOCO" alang sa mga bag-ong episode niini nga makita  karong Sabado (September  12) sa free TV.

Makauban  pa gihapon ni Gus ang mga ABS-CBN News reporter nga sila si Jessie Cruzat ug Jeff Caparas aron isaysay ang pipila sa mga madugong krimen nga natala karong tuiga sa nagkalainlaing bahin sa nasud.

Ang mga bag-ong episode sa "SOCO" kay makita matag Sabado , alas-5 sa hapon sa ALLTV2, A2Z, Kapamilya Channel, ug Kapamilya Online Live, ug alas-5:45 sa hapon  sa ABS-CBN News YouTube channel.

Masterclass

Gihulagway ni Barbie Forteza isip usa ka “masterclass” ang iyang kasinatian sa pagtrabaho kauban si Sharon Cuneta sa  drama series nga “Honor Thy Mother.”Suma pa ni Barbie  nga sa sinugdanan, nagtoo  siya nga istrikta si Sharon  apan nasuta niya nga boutan ug nindot diay katrabaho ang beteranang aktres.

Birthday message

Pagpabuhagay  sa dakong gugma    ang birthday message ni  Chito Miranda alang sa iyang asawa nga si Neri Naig.Nagsaulog si Neri sa iyang birthday niadtong September 7. Gipadayag usab ni Chito ang iyang dakong pagpasalamat kang Neri, nga matud pa niya, makahatag kaniya og kalipay matag higayon nga makita niyang malipayon ang iyang asawa. “Happy Birthday, Ms. Neri.Alam ko naman na alam mo kung gaano kita kamahal.As long as masaya ka, masaya ako… and kahit hindi mo birthday, gusto ko masaya ka palagi,” suma pa  sa singer.

Brian ug Margarita nagpakasal na!

Nagpakasal na sila FPJ Panday Bayanihan Party-list Representative Brian Poe Llamanzares ug Department of Justice (DOJ) Undersecretary Margarita Gutierrez sa niaging adlaw didto sa Santuario de San Jose sa Mandaluyong City. Si Brian, mao ang kinamaguwangan nga  anak sa kanhi Senadora Grace Poe ug Neil Llamanzares, ug apo  nila anhing Fernando Poe Jr. ug Susan Roces.Samtang si Margarita,  usa ka abogada ug anak sa kanhi Justice Secretary ug Ombudsman nga si Merceditas Gutierrez.

Unang halok sa FranSeth giatngan

Sa labing unang  higayon , nisugot na sila Francine Diaz ug Seth Fedelin nga masuwayan ang kissing scene .

Mahitabo kini sa bag-ong proyekto  nila nga iWant micro-drama series nga "A Cake to Remember."

Giatngan na sa ilang fans ang tinud-anay nila nga paghalok atubangan sa kamera.

Kini nga lakang giisip nga sinugdanan  na sa pagdawat ug paghimo nila  Francine ug Seth og mas mature nga mga papel alang sa ilang mga mosunod nga proyekto sa showbiz.

Echo dunay gihangyo sa katawhan

Mibuhi og bug-at nga  pahimangno ang Kapamilya actor nga si Jericho Rosales ngadto sa publiko  nga padayong palamboon  ang kultura ug tradisyon alang sa sunod nga henerasyon.

Sa iyang speech  sa bag-ohay lang nga  2026 Manila International Film Festival (MIFF), gipahimug-atan sa aktor ang  pagpreserbar sa mga importanteng tradisyon.

“What does it mean for me to be on stage? I just wanted to remind everybody that, first of all. please never stop doing things like this, Manila International Film Festival,” matud pa sa aktor sa iyang diskurso.

Dugang pa niya, kinahanglan nga ipadayon ang mga kalihokan  nga nagkahiusa sa nasud.

Gipahinumdoman usab sa aktor ang katawhan bahin sa ilang talento ug kaalam  .

“Tayo ay may liyab sa talento. Tayo ay mahusay sa lahat ng bagay, hindi lang sa pag-aalaga, sa pagbibigay ng pagmamahal. At, tayo ay hindi tanga,” hirit pa sa aktor .

Gitataw usab ni Jericho ang pagtapos sa pipila ka batasan sa katilingban nga nagpadayon sa pamaagi sa pagpahimulos sa uban.

“Tapusin na po natin ang kultura ng utang na loob. Tapusin na po natin ang pang-aalila sa pamamaraan ng pang-uuto at kung ano ano pa. Ngayon ang panahon para buhayin natin ang bagong Pilipino. Mabuhay po kayong lahat,” dugang pa sa aktor.

Kahinumduman nga si Jericho ang napili  isip Best Actor sa 2026 Manila International Film Festival tungod sa iyang talagsaong pagdala sa papel isip kanhi Presidente Manuel L. Quezon sa pelikulang "Quezon" nga ubos sa direksyon  ni Jerrold Tarog.