Duha ka notadong tulisan nasikop

CEBU, Philippines — Duha ka notadong tulisan ang nadakpan sa kapolisan human giingong mitulis sa usa ka 21-anyos nga nursing student sa Cebu City.

Nadakpan sa mga operatiba sa Abellana Police Station 2 sa Cebu City Police Office ang mga suspetsado nga sila si Alfred, 39, usa ka e-bike driver, ug Marlon, 28, usa ka construction worker, sa Balagtas Street, Barangay Pahina Central, niadtong Martes sa gabii, Septiyembre 8.

Sumala sa kapolisan, nahitabo ang pagpanulis alas 2:30 sa kadlawon didto sa Asuncion Street, Barangay Sambag 2, Cebu City.

Ang 21-anyos nga biktima, nga usa ka nursing student, giingong naglakaw pauli human mipalit og pagkaon sa usa ka fast-food chain dihang gisundan ug gihunongan sa duha ka suspetsado nga nagsakay og motorsiklo.

Si Marlon, nga giingong maoy nagmaneho sa motorsiklo, maoy mikuha sa cellphone sa biktima, samtang si Alfred giingong miwakli niini hinungdan nga nalamba ang biktima.

Human sa insidente, misumbong dayon ang biktima sa kapolisan.

Pinaagi sa follow-up operation ug pagsubay sa mga CCTV footage, nasayran ang lokasyon sa mga suspetsado hangtod nga nadakpan sila sa maong lugar.

Narekober usab sa kapolisan ang cellphone sa biktima nga giingong giprenda lakip ang mga sinina, helmet ug motorsiklo nga giingong gigamit sa krimen.

Matud pa sa kapolisan, ang duha ka suspetsado nadakpan na kaniadto may kalabotan sa illegal nga droga ug bag-o pa lang nakagawas sa prisohan.

Ang mga suspetsado anaa sa kustodiya sa kapolisan ug nag-atubang og kasong Robbery. (BANAT NEWS)