Comendador motuman sa suspension order sa Ombudsman

CEBU, Philippines — Gipadayag ni Cebu Port Authority (CPA) General Manager Francisco C. Comendador III nga motuman siya sa preventive suspension order nga gipagawas sa Office of the Ombudsman. Sa iyang opisyal nga pamahayag, miingon si Comendador nga iyang sundon ang direktiba sa Ombudsman aron maseguro ang integridad ug pagkawalay-pinalabi sa imbestigasyon.

“In compliance with the order of the Ombudsman and to ensure the integrity and impartiality of the investigation, I will abide by the directive,” matud ni Comendador.

Iyang gidugang nga mokonsulta siya sa iyang mga abogado aron matino ang angay nga legal nga remedyo nga mahimo niyang gamiton.

Gisuspenso sa Ombudsman si Comendador sulod sa maximum nga unom ka bulan may kalabotan sa administrative complaint nga gisang-at sa Oriental Port and Allied Services Corporation (OPASCOR), nga nag-akusar kaniya og grave misconduct ug gross neglect of duty.

Nagsugod ang reklamo sa mga alegasyon bahin sa operasyon sa Cebu South Harbor and Container Terminal Corporation (CSHCTC), ilabi na sa pagdunggo ug pagdumala sa cargo operations sa mga barko niini nga pribadong pantalan.

Giingon sa OPASCOR nga gitugotan ni Comendador ang mga barko nga mogamit sa CSHCTC bisan pa sa mga limitasyon nga gilatid sa CPA Administrative Order No. 02-2010. Ubos niini nga polisiya, ang pribadong commercial ports mahimong modawat og mga barko ug kargamento kung adunay spill-over demand, emergency, necessity o congestion sa mga pantalan nga gidumala sa CPA.

Ang preventive suspension usa lamang ka precautionary measure samtang nagpadayon ang imbestigasyon sa administrative case. (BANAT NEWS)