Lalaki, menor de edad sikop sa drugbust

CEBU, Philippines — Nasakmit sa hiniusang buy-bust operation sa Regional Police Drug Enforcement Unit 7 (RPDEU7) ug Philippine Drug Enforcement Agency 7 (PDEA7), kauban ang Police Station 6 sa Cebu City, ang 110 gramos nga gidudahang shabu nga adunay Standard Drug Price (SDP) nga P748,000.

Gihimo ang operasyon alas 11:45 sa buntag, Setyembre 8, 2026, sa J.M. Basa, Barangay Sawang Calero, Cebu City.

Nasikop ang 21-anyos nga lalaki nga si alyas “Dagohoy,” usa ka Grab food driver ug residente sa Barangay Ermita, Cebu City. Siya ang giingong target sa buy-bust operation.

Kauban usab sa naluwas sa maong operasyon ang 17-anyos nga lalaki ug gi-turnover sa kustodiya sa City Social Welfare Office alang sa hustong proseso.

Sumala sa inisyal nga impormasyon, kapin usa ka semanang ginungtan sa mga awtoridad ang kalihokan sa mga suspetsado nga giingong nag-operate sa mga lugar sa Ermita, Pasil ug Sawang Calero.

Ang 21-anyos maoy tig-deliver sa ilegal nga droga samtang ang menor de edad giingong gigamit isip bodegero.

Gibutyag usab sa operasyon nga ang grupo makabaligya og mokabat sa 200 gramos nga shabu matag semana.

Giingong ang ilang tinubdan o kontak sa ilegal nga droga mao ang usa ka personalidad nga gikan sa prisohan nga padayon pang giila sa kapolisan ang pagkatawo.

Nakumpiska gikan sa operasyon ang usa ka pakete nga gigamit isip buy-bust item ug lima pa ka dagkong heat-sealed transparent plastic packs nga naay sulod nga gidudahang shabu, usa ka sling bag nga gigamit nga sudlanan sa ilegal nga droga.

Atubangon sa mga nadakapan ang  kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.— IBM BANAT NEWS