Eala tututok na sa Singapore Open

MANILA, Philippines — Sesentro na ang atensiyon ni Pinay netter Alex Eala sa pagsabak nito sa Singapore Open na aarangkada sa Setyembre 21 hanggang 27 sa The Kallang sa Singapore.

Ang Singapore Open ay isang WTA 500 event na tulad ng Mubadala DC Open sa Washington DC kung saan nakamit ni Eala ang kanyang kauna-unahang WTA crown.

Target ni Eala na masungkit ang kanyang ikalawang WTA title sa Singapore Open.

Subalit hindi ito magiging madali dahil kumpirmado na ang pagdating ng mga world-class at top-rated players.

Nangunguna na sa listahan si reigning French Open champion Mirra Andreeva ng Russia kasama si dating Wimbledon champion Barbora Krejcikova ng Czech Republic.

Masisilayan din sa aksyon sina American netters world No. 3 Jessica Pegula at  Amanda Anisimova.

Pasok din si Oleksandra Oliynykova ng Ukraine na tinalo ni Eala sa second round ng US Open sa New York.

Kasama rin sa mga maglalaro sina Ekaterina Alexandrova, Sara Bejlek, Maja Chwalinska, Sorana Cirstea, Elise Mertens, A­nastasia Potapova, Maria Sakkari, Diana Shnaider, Clara Tauson, Janice Tjen, Donna Vekic, at Xinyu Wang.

Galing si Eala sa third round exit sa US Open.

Naputol ang ratsada ni Eala nang lumasap ito ng 5-7, 6-3, 5-7 kabiguan sa kamay ni Iva Jovic ng Amerika.

Matapos ang Singapore Open, agad na tutulak si Eala sa Nagoya, Japan para makasama ang Team Philippines sa kampanya nito sa 2026 Asian Games.