P63 milyon nabayaran sa Kapitolyo nga obligasyon

CEBU, Philippines — Nagkalain-lain nga serbisyo ang naglangkub sa P63 milyones nga nabayaran nga obligasyon sa Cebu Provincial Government lakip niini ang catering, scholarship, infrastructure ug professional fees.

Matud ni Cebu Governor Pamela Baricuatro nga ang P63 milyones naglangkub lang sa mga obligasyon nga adunay igo ug kompleto nga supporting documents.

Ang ubang claims nga wala pa makompleto ang requirements nagpadayon pa sa verification sa probinsiya.

Atol sa prorgrama sa radyo ni Atty. Ruphil Bañoc gihulagway ni Baricuatro nga daghan ug nagkalain-lain ang mga obligasyon nga natigom sulod sa mga nangaging tuig.

Lakip sa mga nabayaran ang mga serbisyo mao ang catering services, talent fees ug uban pa’ng contracted services.               

Matud ni Baricuatro nga adunay mga negosyante nga naapektohan sa dugay nga paghulat sa bayad ug adunay uban nga napugos sa paghunong sa ilang negosyo.

Si Assistant Provincial Administrator Aldwin Empaces nipadayag nga ang mga obligasyon nagtumong sa mga bayranan nga kinahanglang ihatag sa probinsiya ngadto sa mga supplier ug service provider nga nakahatag na sa ilang serbisyo.

Gipadayag usab ni Empaces nga apil sa P63 milyones ang scholarship-related obligations, catering services, infrastructure programs ug professional fees alang sa mga speakers, coaches ug lecturers nga nakaserbisyo na sa probinsiya apan wala pa mabayari.

Apan matud sa opisyales nga dili tanang claims mahimong bayaran dayon diin kinahanglan una kining masusi ug masuportahan sa hustong dokumento ilabina sa mga proyekto nga mahimong adunay mga isyu sa procurement o bidding.

Ang gobernador nagkanayon nga posible pa nga molapas sa P63 milyones ang total sa mga obligasyon diin ang mga nabayaran pa lang mao kadtong adunay supporting documents.

Samtang si Empaces nagkanayon nga ang mga karaang obligasyon kinahanglan pa’ng moagi sa legal ug documentary process.

Sa infrastructure-related claims, kinahanglan susihon kong nakasunod ba kini sa bidding process, samtang ang mga obligasyon mismo anaa na sa bookkeeping records sa probinsiya.

Gipadayag ni Empaces nga ang P63 milyones mao ang kantidad nga nabayran na kutob Hulyo 31 samtang nagpadayon pa ang pagproseso sa ubang obligasyon. BDB BANAT NEWS