Illegal quarries sa kabukiran, gipasagdan ra?

CEBU, Philippines — Nabalaka si Konsehal Joel Garganera tungod kay nakita niya nga dili seryoso ang kasamtangang administrasyon batok sa giingong illegal quarrying operations sa bukirang bahin sa Dakbayan sa Sugbo.

Sa pagpakighinabi kang Garganera, dili lang ang upland developments ang angayan tutokan sa kagamhanan tungod kay dako usab ang problema nga nalambigit sa quarry operations, ilabi na sa mga bukirang barangay sa norte distrito. Sa usa ka inspection sa Binaliw Landfill niadtong miaging semana, matud pa ni Garganera nga iyang nakita kauban sila Konsehal Philip Zafra ug Konsehal Paul Labra ang pag-agi sa 20 ka dagkong 10-wheeler truck nga nagdala og mga mineral.

Bisan pa man og dugay na siya nga gamonitor sa mga ilegal nga quarrying ug daghan na sab ang nadakpan sa maong ilegal nga operasyon, apan nakita niya nga makabuhi ra gihapon ug padayun ang mga operasyon.

“And way I look at it, this administration is not really serious in going after this illegal quarrying,” matud ni Garganera.

Nagduda si Garganera nga adunay nagpaluyo o gisaligan sa pagpagawas sa mga nadakpan apan wala siya nasayod kung kinsa.

Matud pa niya, gabii sila manakop sa mga nalambigit sa quarrying kaniadto kay gabii ra man sab sila mangubkob, apan karon, bisan udtong dako walay hunong ang pagpahak sa kabukiran sa Cebu City.

Gihimug-atan sab ni Konsehal Harry Eran nga ang isyu sa quarrying mosumbalik gihapon sa polisiya sa kagamhanan.

Gisugyot karon nga magpatuman og moratorium sa tanang movement sa upland areas aron mahatagan og panahon ang kagamhanan sa pag-assess ug pag-evaluate sa mga operasyon.

Gipadayag sab ni Garganera nga dunay mga taho gikan sa Cebu City Environment and Natural Resources Office (CCENRO) sa mga quarry operation nga gi-isyuhan na og cease-and-desist order, apan giingon niya nga ang mga operasyon nga nagpadayon gihapon.

Si Garganera usa usab ka miyembro sa Mining Board, bisan wala siyay voting rights, apan sa iyang nahinumdoman kaduha gyud sila mag meeting sa Mining Board kada buwan kaniadto. Apan sukad sa paglingkod ni Mayor Nestor Archival, si Garganera niini nga katulo pa lang ka higayon nga naay nahitbaong panagtigom sa mining board.

Alang kang Garganera, dako kini nga problema tungod kay lisod matubag ang mga reklamo sa quarrying kung panagsa ra maghisgot ug magdesisyon ang Mining Board bahin sa maong mga isyu. — /IBM (BANAT NEWS)