P100 milyong kontrabando, nasamsam ng Philippine Navy

MANILA, Philippines — Umaabot sa P100 milyong halaga na kontrabando ang nasamsam ng Philippine Navy sa isinagawang tatlong maritime operations mula Agosto 28 hanggang Setyembre 3, ayon sa ulat kahapon.

Kabilang sa mga nasamsam ay ang mga hindi dokumentadiong diesel fuel na nagkakahalaga ng P 72,172,046; smuggled na dayuhang brand ng sigarilyo at mga illegal na trosong Lauan na nagkakahalaga ng P251,999.

Sa kabuuan umaabot sa P99,653,015 ang kabuuang nakumpiskang mga illegal na kontrabando kasama na ang vessel na pinagkargahan sa nasabing mga smuggled na goods.

Bago ang operasyon ay nakatanggap ng impormasyon ang Philippine Navy hinggil sa illegal na smuggling operations kaya agad na nagsagawa ng masusing pagmomonitor na nagresulta sa pagkakasamsam ng mga kontrabando.

Inihayag ni Rear Admiral Constancio Arturo Reyes Jr., Commander ng Naval Command Western Mindanao na ang pagkakasamsam sa nasabing mga smuggled goods ay bunga ng mahigpit na anti-smuggling operations ng mga operatiba ng Philippine Navy.