CECABA All Stars nakasagunson og daog

CEBU, Philippines — Ang Cebu Eastern College Alumni Basketball Association (CECABA) All Stars nga gipangulohan ni Chester Cokaliong miligid sa ikaduha nilang sunod-sunod nga daog uban ang 100-69 nga paglampaso sa Toyota Mandaue North sa 1st Edgar Cokaliong Memorial Cup Basketball Tournament nga gipaluyohan sa Shell Pilipinas Corporation sa Don Edgar Stadium sa Cokaliong Tower.

Si Mark Eugene Bukiron mao na sab ang nangu sa CECABA uban ang 21 puntos samtang si Cokaliong milansang og lima ka 3-pointers sa iyang 17 puntos. Nagkumbinar sila og 17 puntos sa unang kuwarter aron ituboy ang mga Easternians ngadto sa sayong 23-13 nga labaw.

Sila si BJ Zosa, Richard Yu, Marven Bauya, ug Karl Tiu mao na ang misalida sa dihang gilabhan sa CECABA ang Toyota Mandaue sa ikaduhang kuwarter, 29-16, aron pagposte og 52-29 nga bentaha sa halftime, nga ila pang gipaburot ngadto sa 80-50 human sa ikatulong kuwarter.

Ang CECABA wala mikompiyansa bisan sa dako nilang labaw dayon na ngadto sa impresibong 31 puntos nga demolisyon.

Sa kinatibuk-an, unom ka CECABA players ang mikulit og double figures. Si Tiu mitali og 14 puntos, si Harold James Tan mibubo og 10 sa iyang 12 puntos sa second half, samtang sila si Yu ug Zosa mitimbre og 10 puntos matag usa.

Si James Lan mitapos uban ang 17 puntos samtang sila si JP Batac ug Jason Estremos nagkumboya'g 25 puntos apan nakawang ang ilang paningkamot kay ang Toyota Mandaue naghagba human sa madaogon nga sinugdanan.

Sa laing duwa, si Alvin Bustos mipabuto og 28 puntos samtang sila si Jonel Camboanga ug Reil Young nagkumbinar og 38 puntos sa dihang ang Wednesday Club miangkon sa una nilang daog piaagi sa kubahinam nilang pagbuntog sa Monday Hoopers, 93-92.

Si Michael Viliran mitampo og 10 puntos alang sa Wednesday Cub, nga milusad og eksplosibong 30-19 rally sa katapusang kuwarter aron bughaon ang Monday Hoopers.

Si Oliver Yguinto mipatuasik og 30 puntos samtang si Nario Salibay mibirada og 25 puntos apan wala mosaler ang maanindot nilang duwa gumikan kay ang Monday Hoopers naparot sa ikaduhang sunod-sund nga higayon.

Mga iskor

Unang duwa

Wednesday Club (93) — Bustos 28, Camboanga 20, Young 18, Viliran 10, Amora 9, Eboy 2, Stella 2, Ceballos 2

Monday Hoopers (92) — Yguinto 30, Salibay 25, Eriso 13, Apa 10, Dizon 8, Aduani 7

Quarterscores:15-23;47-42;73-63;93-92

Ikaduhang duwa

CECABA All Stars (100) — Bukiron 21, Cokaliong 17, Tiu 14, Tan 12, R. Yu 10, Zosa 10, Bauya 7, JJ Yu 5, Chan 2, Dy Teves 2

Toyota Mandaue (69) — Lan 17, Batac 14, Estremos 11, Co 9, Lao 8, Soco 8, Estenzo 6 .

Quarterscores:23-13;52-29;80-50;100-69.