Air quality sa Sugbo posibleng mosaka sa emergency level

CEBU, Philippines — Posibleng mosaka ngadto sa emergency level ang air quality sa Cebu kong magpadayon ang pagkagrabe sa wildfire sa Indonesia, matud sa Department of Environment and Natural Resources-Environmental Management Bureau (DENR-EMB)-7.

Gipasidan-an sa EMB ang mga Sugboanon nga dili magkampante ug giawhag ang publiko nga mag-amping ilabi na ang mga adunay respiratory illnesses ug uban pa’ng vulnerable groups.

Matud ni DENR-EMB-7 Senior Environmental Management Specialist Arthur Niño Calupig nga dili mahimong isalikway ang posibilidad nga mosamot pa ang air quality kong magpadayon ang wildfire sa Indonesia.

Base sa monitoring sa EMB-7, ang Metro Cebu monitoring station nakatala og Air Quality Index (AQI) nga 252 sa alas 11:00 sa buntag nga gi-classify isip Acutely Unhealthy.

Sa Barangay Cabitoonan, Dakbayan sa Toledo, 227 usab ang AQI ug parehas nga classified nga Acutely Unhealthy.

Una na’ng nakatala ang Metro Cebu og AQI nga 241 sa alas 4:00 sa kadlawon ug nisaka kini ngadto sa 252 nga nagpakita nga nagpabiling taas ang lebel sa pollutants sa hangin. Girekomendar ni Calupig nga limitahan sa publiko ang paggawas ug kong mahimo magpabilin sulod sa balay samtang padayon ang monitoring sa mga awtoridad.

Girekomendar usab ang paggamit og KN95 mask alang sa mga kinahanglang mogawas tungod kay kini makatabang sa pag-filter sa gagmay kaayong particles sama sa PM2.5.

Gipasabot ni Calupig nga ang kasamtangang kahimtang angay seryosohon tungod sa posibleng epekto niini sa panglawas ilabi na sa mga adunay sakit sa respiratory system. Matud usab sa EMB nga ang kasamtangang haze dili lang resulta sa lokal nga polusyon naglambigit usab kini sa transboundary haze diin ang aso ug fine particles gikan sa wildfire sa Indonesia madala sa hangin nganhi sa Pilipinas.

Gibutyag ni Calupig nga base sa report sa ilang central office niubos na ang pollutant levels sa lugar nga unang naapektohan apan ang haze nibalhin ngadto sa Visayas ug Mindanao.

Ug tungod sa meteorological conditions posible nga maapektohan dili lang ang Metro Cebu apan lakip na ang tibuok Probinsiya sa Cebu lakip ang Bohol.

Wala pa’y tukmang timeline kong kanos-a hingpit nga mawala ang haze tungod kay padayon pa ang wildfire activity.  Si Calupig nagkanayon nga ang ulan usa sa natural nga paagi nga makatabang sa pagpaubos sa concentration sa pollutants. (BANAT NEWS)