P21.48M shabu nasakmit, 821 ka suspek nadakpan

CEBU, Philippines — Mokabat sa P21.48 milyones nga kantidad sa ilegal nga droga ang nasakmit sa Police Regional Office 7 (PRO 7) atol sa 753 ka operasyon sa Central Visayas niadtong Agosto, gikan sa 821 ka mga suspetsadong  nalambigit sa ilegal nga droga nga ilang nadakpan.

Sumala sa PRO 7, mikabat sa 3,158.05 gramos nga methamphetamine hydrochloride o shabu, nga nagkantidad og P21,474,719.60, ang nakumpiska sa nagkadaiyang operasyon.

Gawas sa shabu, nakasakmit usab ang kapolisan og mga uga nga dahon ug tanom sa marijuana nga nagkantidad og P9,408, nga mipataas sa kinatibuk-ang kantidad sa mga ilegal nga droga nga nakumpiska ngadto sa P21,484,127.60.

Lakip sa mga operasyon nga gipahigayon sa kapolisan ang mga buy-bust operation, pagpatuman sa mga warrant of arrest, checkpoint ug pagtubag sa mga insidente nga may kalabotan sa ilegal nga droga.

Ang Cebu Police Provincial Office (CPPO) ang naka-rekord sa kinadak-ang drug haul gikan sa sa mga operating units sa PRO 7, diin P5,580,776 ang kantidad sa ilegal nga droga nga nasakmit.

Misunod niini ang Mandaue City Police Office (MCPO) nga nakumpiska og P4,680,516 nga kantidad sa ilegal nga droga; Cebu City Police Office (CCPO), P3,736,576; Bohol Police Provincial Office (BPPO), P3,710,943.60; Regional Police Drug Enforcement Unit (RPDEU), P2,822,000; ug Lapu-Lapu City Police Office (LCPO), P953,316.

Gidayeg ni PRO 7 Regional Director PBGen Arnold E. Abad ang mga operating unit ug personnel tungod sa ilang padayong operasyon batok sa ilegal nga drug trade ug sa ilang paningkamot nga mapahilayo ang delikadong mga substansiya sa mga komunidad.

Matud ni Abad, magpabiling agresibo, procedure-based ug walay kompromiso ang kampanya sa PRO 7 batok sa ilegal nga droga.

Gipasabot usab niya nga dili lamang magpunting ang kampanya sa mga operasyon sa kadalanan, kondili palig-onon usab sa PRO 7 ang intelligence-driven, dunay koordinasyon ug tukmang mga operasyon batok sa mga indibidwal ug grupo nga nalambigit sa ilegal nga drug trade.

Ang gipakusgang kampanya, matud ni Abad, nahiuyon usab sa focus agenda sa Philippine National Police (PNP) nga “Serbisyong Mabilis, Tapat at Nararamdaman” alang sa katawhan sa Central Visayas.

Giawhag usab sa PRO 7 ang publiko nga magpabiling mabinantayon ug mahimong aktibong kauban sa kapolisan sa kampanya batok sa ilegal nga droga pinaagi sa pagreport dayon sa mga gidudahang kalihokan nga may kalabotan niini. (BANAT NEWS)