Mag-ama nilamon ng ilog sa Zambales
MANILA, Philippines — Patay ang isang 35-anyos na ama at anak nitong lalaki makaraang lamunin ng ilog at tangayin ng malakas na agos sa Botolan, Zambales, ayon sa ulat kahapon.
Sa report ng Botolan Municipal Disaster Risk Reduction and Management Office (MDRRMO), nangyari ang insidente sa nasabing bayan dakong ala-1 ng hapon noong Martes.
Ayon sa imbestigasyon, pauwi na ang mag-ama sa kanilang tahanan sakay ng cart o “kangga” na hinihila ng kanilang alagang kalabaw nang tangayin ito ng malakas na agos ng tubig baha at mapadpad sa ilog.
Sa isinagawang search and rescue operation ng mga awtoridad, narekober ang bangkay ng 35-anyos na tatay si Simeon Candule, residente ng Brgy. Palis ng bayang ito.
Isang residente sa lugar ang nakasaksi sa pangyayari, pero dahil sa malakas na agos ay nabigong tulungan ang mag-ama.
Nagsagawa ng rescue operation ang mga awtoridad at narekober ang bangkay ni Candule habang patuloy pang pinaghahanap ang nawawalang anak ng nalunod na ama.
- Latest
