Marine corporal nabaril ng kabaro, sugatan
COTABATO CITY, Philippines — Isang miyembro ng 6th Marine Battalion ang sugatan nang hindi sinadyang mabaril ng kasama sa kanilang barracks sa kanilang battalion headquarters sa Barangay Rosary Heights 9 sa Cotabato City nitong umaga ng Martes.
Sa ulat ng Cotabato City Police Office, inaayos ni Corporal Noe Mama, Jr. kanyang mga gamit at nag-load ng kanyang MFR 56 rifle na kanyang aksidenteng nakalabit kaya pumutok habang nakatutok sa dingding ng kanilang bunker at tumagos sa manipis na dingding nito at nasapol ng bala sa tagiliran ng 38-anyos na kasamang si Sgt. Gerald Ejemplar.
Si Corporal Mama ay taga Barangay Poblacion sa Sta. Josefa sa Agusan del Sur habang si Sgt. Ejemplar ay tubong Barangay Nilidan sa Kalamansig, Sultan Kudarat. Silang dalawa ay mga kasapi ng 6th Marine Battalion ng 1st Marine Brigade ng Philippine Navy na may units sa Cotabato City at Maguindanao del Norte.
Si Ejemplar, nagtamo ng tama ng bala sa kaliwang tagiliran, na kasalukuyang ginagamot na sa Cotabato Regional Medical Center na hindi kalayuan sa kanilang battalion command post kung saan naganap ang insidente.
- Latest
