Groom at bride nag-‘I do’sa gitna ng baha sa Bulacan

HAGONOY, Bulacan, Philippines — Sa kabila ng matin­ding pagbaha sa lalawigang ito, hindi naging hadlang ang mataas na tubig upang ituloy ng isang magkasintahan ang kanilang pinakahihintay na araw ng kasal.

Sa St. John the Baptist Parish sa Hagonoy, lumusong ang bride at groom kasama ang kanilang mga ninang at ninong, mga pamilya, mga abay at iba pang dumalo sa malalim na bahagi ng tubig baha sa loob ng simbahan na pinalubog ng  malawakang pagbaha nitong mga nakaraang linggo. 

Bagama’t malalim pa rin ang tubig baha, itinuloy pa rin ng pari ang kanilang seremonya, sa halip na ipagpaliban ang matagal nang pinaghandaang pag-iisang dibdib ng mag-­nobyo. Isang kasal na hindi lamang tungkol sa “for better or for worse,” kundi literal na pagharap sa unos at baha—kasama ang pangakong manatiling magkasama sa gitna ng pagsubok.

Sa isang ulat, umabot sa hanggang 1.82 metro o halos anim na talampakan ang baha sa ­ilang bahagi ng Hagonoy at mga kalapit na bayan. 

Sa mga nakalipas na araw, ipinakita rin sa mga ulat ang patuloy na pagdalo ng ilang deboto sa San Juan Bautista Parish, kung saan gumamit pa ng mga monoblock chair upang makadalo lang sa misa kahit lubog sa tubig baha ang loob ng simbahan.