Nagpabakuna kontra tipdas gamay palang gihapon
CEBU, Philippines — Mokabat sa 137,042 o 21.7 porsiyento sa 630,214 ka mga bata nga target mabakunahan ang nakadawat sa measles-rubella (MR) vaccine sa Central Visayas hangtod Agosto 29.
Ang maong datos natala ubos sa Ligtas Tigdas o Measles-Rubella Supplemental Immunization Activity (MR-SIA) sa Department of Health-Central Visayas Center for Health Development (DOH-7), nga gipahigayon gikan Agosto 10 hangtod 29.
Target sa programa ang mga batang nag-edad og unom hangtod 59 ka bulan sa mga probinsya sa Bohol ug Cebu, lakip ang highly urbanized cities sa Cebu, Lapu-Lapu ug Mandaue.
Base sa pinakabag-ong accomplishment report, 493,172 ka mga bata o 78.3 porsyento sa target ang wala pa makadawat sa MR vaccine.
Ang Mandaue City ang adunay pinakataas nga vaccination coverage nga 29.1 porsyento, gisundan sa Lapu-Lapu City nga 27.4 porsyento, Bohol nga 22.3 porsyento, Cebu Province nga 20.9 porsyento, ug Cebu City nga 18.4 porsyento.
Matud sa DOH-7, ang MR vaccine naghatag og dugang proteksyon batok sa tigdas ug rubella, nga mahimong hinungdan sa seryosong komplikasyon ilabina sa mga bata. Gipasiguro usab sa DOH-7 sa mga ginikanan nga luwas ug epektibo ang bakuna ug giawhag sila nga pabakunahan ang ilang mga anak nga kwalipikado.
Matud ni Dr. Van Philip Baton, hepe sa DOH-7 Local Health Support Division, mahimong i-extend sa mga local government unit ang MR-SIA hangtod Septiyembre 4 aron maabot pa ang mas daghang kwalipikadong mga bata sa dili pa mobalik sa regular nga immunization program.
Nanghinaot usab si Baton sa mga ginikanan, lakip na ang mga nagduhaduha sa pagpabakuna, nga mosuporta sa kampanya sa immunization.
“Mag-ampo tang tanan labi na mga antivaxers nga walay outbreak,” matud ni Baton. Ang mga ginikanan kansang mga anak makasinati og bisan unsang reaksyon human mabakunahan gitambagan nga mokonsulta o mokontak dayon sa ilang health center o pinakaduol nga health facility.
Kahinumdoman nga nikatap sa social media ang mga posts nga nakapahadlok sa mga ginikanan para pabakunahan ilang mga anak kontra tipdas. — /IBM (BANAT NEWS)
- Latest
