P200,000 nga ayuda ihatag sa matag barangay

CEBU, Philippines — Ang matag barangay sa nasud makadawat og P200,000 ubos sa Bawat Barangay Makikinabang (BBM) Program ni Presidente Ferdinand R. Marcos Jr.

Ang pondo gitumong sa mga kwalipikadong estudyante ug mga angay nga proyekto sa komunidad.

Gihisgutan ang pagpatuman sa programa atol sa Kapihan sa PIA, diin si DILG-7 Local Government Operations Officer V Norman Contado ug mga opisyal sa barangay sa Cebu City ang mangu sa pag-apod-apod ug pagmonitor sa pundo.

Matud ni Contado, ang Department of the Interior and Local Government (DILG), pinaagi sa National Barangay Officials Office ug mga field office niini, motabang sa Liga ng mga Barangay sa pagpatuman sa programa, pagmonitor sa pagsunod sa guidelines ug pagreport sa implementation updates sa central office. Ubos sa guidelines, P100,000 sa P200,000 nga allocation alang sa lima ka Bagong Pilipinas Barangay Scholars, diin matag kwalipikadong benepisyaryo makadawat og P20,000.

Ang mga benepisyaryo kasagarang graduating students sa school year 2026-2027 nga gikan sa mga pamilyang huyang ang kahimtang, nameligro nga mohunong sa pag-eskwela ug gikan sa mga pamilyang walay college graduate. Kinahanglan usab nga residente sa barangay.

Kon walay kwalipikadong graduating students, mahimong ikonsiderar ang kwalipikadong third-year student o TESDA scholars, basta matuman ang mga requirements.

Matud ni Barangay Zapatera Captain David M. Agravante, dako og tabang ang scholarship assistance sa lima ka benepisyaryo sa ilang komunidad.

Gipili ang mga benepisyaryo base sa kwalipikasyon sa programa ug gisiguro sa barangay nga magamit ang ayuda alang sa edukasyon. Sa pipila ka kaso, direkta nga gipadala ang ayuda sa eskwelahan aron masiguro ang hustong paggamit niini.

Ang nahibiling P100,000 gamiton alang sa mga kwalipikadong proyekto sa barangay.

Sa Cebu City, nagkauyon ang mga barangay sa pagpalit og 100 ka monoblock chairs ug duha ka steel-pipe tents matag barangay.

Samtang, matud ni Barangay Kamputhaw representative ug councilor Judylyn Solon-Cantal, naghimo ang barangay og proseso aron masiguro nga ang lima ka benepisyaryo nakatuman sa mga requirements sa programa.

Ang mga potensyal nga benepisyaryo gipaubos sa verification, lakip ang pagsusi sa ilang kahimtang.

Gihatagan og P20,000 nga ayuda ang lima ka benepisyaryo atol sa barangay session niadtong Agosto. Matod ni Solon-Cantal, gikalipay kaayo sa mga estudyante ang tabang nga ilang nadawat nga magamit kaayo sa ilang pagtungha. — /MEL (BANAT NEWS)