Criminology student tiklo sa buy-bust

MANILA, Philippines — Isang estudyante ng kursong Criminology ang bumagsak sa kulungan nang malambat ng mga otoridad sa isang operasyon laban sa iligal na droga sa Purok 3, Barangay Miswa, Infanta, Quezon noong Agosto 27, 2026 ng madaling araw.

Kinilala ang suspek na si Alyas “Jon”, may sapat na taong gulang at residente ng Barangay Cawayan, Real, Quezon.

Batay sa ulat, alas-12:30 ng madaling araw nang isagawa ang operasyon na pinangunahan ng Drug Enforcement Team ng Infanta Municipal Police Station (MPS) sa ilalim ng koordinasyon ng Philippine Drug Enforcement Agency (PDEA).

Ayon sa opisyal na ulat ng kapulisan, nahuli sa akto ang suspek matapos nitong makipagtransaksyon sa isang undercover agent na umaktong poseur-buyer.

Nang magkaabutan ng ilegal na kontrabando kapalit ng marked money, agad na pinalibutan ng mga operatiba ang suspek at agad na naaresto.

Nasamsam mula sa posisyon ng estudyante ang tatlong heat-sealed transparent plastic sachet na naglalaman ng hinihinalang shabu na tumitimbang nang humigit-kumulang 2.32 gramo ang droga na may Standard Drug Price na P15,776.00.