Kasaysayan nag-atang ni Coach Gary Cortes

CEBU, Philippines —  Ang head coach sa University of the Visayas (UV) Green Lancers nga si Gary Cortes gipaabot nga mohimo og kasaysayan sa Cebu Schools Athletic Foundation, Inc. (CESAFI).

Aron kini niya makab-ot, si Cortes gikinahanglan lamang nga motikang sa korte.

Si Cortes opisyal nga mamahimong labing dugay nga coach nga nagtimon sa usa ka college basketball team sa CESAFI sa dihang ang Lancers mokumbati sa unang higayon sa ika-26 nga season sa liga batok sa University of San Carlos (USC) Warriors karong adlawa (Domingo, Agosto 30) sa Cebu Coliseum.

Magsugod ang ilang sangka sa alas  3:30 sa hapon.

Si Cortes mosud sa ika-10 niyang season uban sa Lancers diin iya nang malabwan ang siyam ka tuig ni Elmer "Boy" Cabahug, nga migiya sa UV ngadto sa rekord nga siyam ka sagunson nga korona gikan sa pagkahimugso sa  CESAFI niadtong 2001 ngadto sa 2009.

Sukad siya gitudlo nga coach sa UV niadtong 2015, si Cortes nangu sa Lancers ngadto sa siyam ka sunod-sunod nga pagtaak sa finals.

Si Cortes ug ang Lancers nakadaog og Grand Slam gikan sa 2016 ngadto sa 2018 ug dayon misakmit og upat ka sagunson nga titulo sukad sa comeback season sa liga niadtong 2022 human sa kalibutanhong pandemiya.

Upan ang pito ka tropeyo, si Cortes nanginahanglan og duha na lang ka kampiyonato aron tablahon ang rekord ni Cabahug isip labing daogan nga collegiate coach sa 26 ka tuig nga kasaysayan sa liga.

"I just love what I am doing," tubag pa ni Cortes sa dihang gisukna kon unsay sekreto sa iyang kadugay sa Lancers.

"This is my passion, and a sort of advocacy for me - to guide and help young players nga makahuman og kurso sa kolehiyo while playing the game we all love ug labaw sa tanan mapalayo sila sa mga bisyo ug sa mga dautan." Naglantaw sa unahan, si Cortes nakanayon nga iyang serbisyohan ang mga Visayanian hangtud kutob sa iyang makaya.

"Mopadayon ko og coach hangtud seguro mapul-an na ang UV nako," dason pa ni Cortes. "Kay we all know nga walay coach nga indispensable. Bisa'g pila pa na ka championships imong nadaog, everything has an end sooner or    later." Sa pagka karon, si Cortes malipayon ug mapasalamaton sa pagsalig nga gihatag kaniya sa UV ug sa pamilyang Gullas.

"Sa UV Admin ug sa Gullas family, daghang salamat sa pagsalig ug paghimo kanako nga champion coach.  To UV community, salamat sa padayon nga suporta nga maoy nagduslit kanamo sa pagkayod ug pagpakigbisog paingon sa kalampusan," panapos pa ni Cortes.