DVMF malamposon sa serbisyo sa pagpahimsog sa mga hayop

CEBU, Philippines — Nakakolekta ang Cebu City Department of Veterinary Medicine and Fisheries (DVMF) og P2,453,110.83 sa buwan sa Hulyo 2026 tungod sa malampusong pagpalig-on sa serbisyo sa kahimsog sa mga hayop, inspeksyon sa karne ug isda ug pagpalambo sa regulatory services.

Natala sa buhatan nga adunay 117 ka iro ug iring ang naserbisyohan karong tuiga ubos sa Catch-Neuter-Vaccinate-Release (CNVR) Program.

Gipalig-on sa buhatan ang registration ug vaccination services sa mga barangay kun diin anaa sa 95 ka iro ug 40 ka iring ang rehistrado ug nabakunahan.

2,184 ka mga hayop ang nabakunahan batok rabies, 451 ka castration, 496 ka spay procedures, 563 ka deworming, 563 ka mange treatments, 563 ka wound treatments, ug 619 ka paghatag og bitamina sa buwan sa Hulyo.

Samtang gihingusgan ang pagpamakuna sa mga high-risk areas, gipadayon sab sa DVMF ang African Swine Fever information ug biosecurity campaigns sa mga barangay sa Inayawan, Quiot, Cogon Pardo ug sa mga kabukirang barangay.

Nakig-alayon sab ang DVMF sa Bureau of Animal Industry Quarantine Office- 7 ug Cebu Port Authority isip pagpangandam sa pagpatuman sa border control measures batok sa ASF. Ang inisyatiba nagtumong sa pagpalig-on sa monitoring ug inspeksyon aron mapugngan ang pagsulod ug pagkaylap sa ASF pinaagi sa pagbalhin sa buhing baboy ug pork products.

Ubos sa City Meat Inspection Service, gitigom sa buhatan ang mga tigbaligya og karne, manok, operators sa pribadong ihawan, ug ubang stakeholders aron masiguro nga masunod ang hustong pagdumala sa binuhing hayop, sanitasyon, ug inspeksyon sa mga produktong karne.

Sa laing bahin, natubag sab sa DVMF ang unom ka reklamo bahin sa animal neglect o ang gipangmaltrato nga mga hayop. Gipahigayon ang site visits, interbyu, ug pagkuha og ebidensiya uban sa mga barangay public safety officers. Usa ka citation ticket ang giisyu ug nabayran sa kantidad nga P5,000 samtang walay napamatud-ang paglapas sa ubang mga kaso.

Sa meat inspection operations, nasuroy sa DVMF ang 11,371 ka baboy ug 139,209 ka manok pinaagi sa pagsubay sa mga rehistradong pribadong ihawan ug National Meat Inspection Service-accredited facilities.

Natala sab ang 1,151.75 ka kilo sa condemed nga karne ug laing 711.755 ka kilo ang gikumpiska tungod sa paglapas sa mga regulasyon sama sa sayop nga pagdumala ug kakuwang sa gikinahanglang inspeksyon ug dokumentasyon. Duha ka citation ug tulo ka stern warnings ang giisyu sa mga nakalapas.

Ang Registration and Licensing Section nakatigom usab og P107,050 sa buwan sa Hulyo kun diin P76,050 ang alang sa registration ug licensing fees ug P31,000 sa mga penalty.

Sa bahin sa Fishery Division, gi-inspeksyon ang gibana-bana 2.2 milyones ka kilo sa isda.

Nakatigom usab ang Fishery Division og gibanabana nga P146,748 sa regulatory service fees ug nagpahigayon og market denial operations sa South Road Properties (SRP) kauban ang Maritime Police ug Cebu City Bantay Dagat Commission. (BANAT NEWS)