P12.34 bilyong halaga ng illegal drugs, winasak ng PDEA
MANILA, Philippines — Nasa mahigit 2.2 metriko toneladang iligal na droga na tinatayang nagkakahalaga ng P12.34 bilyon ang winasak ng Philippine Drug Enforcement Agency (PDEA) sa pamamagitan ng thermal decomposition sa Trece Martires City, Cavite nitong Agosto 27.
Ayon sa PDEA, umabot sa 2,224,679.9705 gramo ng solid dangerous drugs at 106,386.0500 mililitro ng liquid drugs ang isinailalim sa disposal sa Integrated Waste Management Inc. sa Barangay Aguado.
Ito na ang pinakamalaking volume ng dangerous drugs na winasak ng ahensya ngayong taon.
Pinakamalaki sa winasak ang 1,774,023.9425 gramo ng methamphetamine hydrochloride o shabu na nagkakahalaga ng tinatayang P12.06 bilyon. Kabilang dito ang 876,000 gramo ng shabu na nasabat sa MIMAROPA at 906,406.40 gramo na nakumpiska sa Valenzuela City.
Sinira rin ang 433,336.9546 gramo ng marijuana, 2,208.7373 gramo ng cocaine, gayundin ang iba’t ibang uri ng dangerous drugs tulad ng MDMA, ketamine, nitrazepam at psilocybin. Kasama rin sa disposal ang liquid marijuana, liquid methamphetamine hydrochloride at 15,000 gramo ng mga expired na gamot.
Ang aktibidad ay isinagawa matapos makumpleto ang kinakailangang legal na proseso para sa disposal ng mga nakumpiskang droga.
- Latest
