15-anyos sinisid cellphone kapalit ng P1K, patay!
MANILA, Philippines — Naging mitsa ng buhay ng isang 15 anyos na batang lalaki ang pagsisid nito sa isang cellphone na nahulog sa dagat kapalit ng P1,000 na ibabayad sana rito kapag nakuha ang naturang electronic device sa Brgy. Hagnaya, San Remegio, Cebu, ayon sa ulat kahapon.
Kinilala ang biktima sa pangalang Mark, residente sa lugar na anak ng isang mangingisda.
Sa report ng San Remegio Police, dakong alas-9 ng gabi lulan ng bangka si Mark at ilan nitong kaibigang kabataang mangingisda galing sa San Remegio Fish Port nang lapitan ng isang 23-anyos na apprentice na pasahero ng barko matapos na malaglag sa dagat ang kaniyang cellphone sa bahagi ng Hagnaya Pier sa nasabing lugar kamakaialn
Inalok umano ng naturang apprentice ang mga kabataan na sisirin ang kaniyang cellphone at handa siyang magbayad ng P1,000 kung maibalik ito sa kaniya.
Nag-unahan naman sa pagsisid ang nasabing mga kabataan nang bigla umanong mawala sa kanilang paningin si Mark.
Nang mabatid ang insidente, agad na nagsagawa ng search operation ang Philippine Coast Guard (PCG), pero bigong matagpuan ang binatilyo.
Kinabukasan, dakong alas-7:46 ng umaga nitong Agosto 24 ay natagpuan ang bangkay ng biktima na sumabit sa rampa (ramp) sa Hagnaya Port.
- Latest
