Garganera: Tanang waste disposal facilities ipaubos sa ocular inspection

CEBU, Philippines — Gisugyot ni Konsehal Joel Garganera nga himuon una ang ocular inspection sa tanang waste disposal facilities nga andam modawat sa basura sa Dakbayan sa Sugbo sa dili pa ipadayon ang bidding ug ang pagpili sa disposal facility.

Base sa resolusyon ni Garganera, tsirman sa Committee on Environment nga kinahanglan ang pagpahigayon og ocular inspection pinaagi sa pagtinabangay sa Sangguniang Panlungsod, Cebu City Disaster Risk Reduction and Management Office (CCDRRMO), Cebu City Environment and Natural Resources Office (CCENRO), Office of the Building Official (OBO) ug uban pa’ng buhatan ug teknikal nga personnel.

Tumong sa inspection ang pagsiguro kon ang matag pasilidad adunay igo nga kapasidad, lig-on nga imprastraktura, adunay nakaandam nga safety measures ug environmental safeguards ug husto ang proseso sa pagdumala ug paglabay sa basura ingon man ang gikinahanglang permits ug clearances aron makadawat sa basura sa siyudad.

Apil usab sa inspection ang pagsuta kong unsay posibleng epekto nga masinati sa residente nga nagpalibot sa maong waste disposal facility aron dili na makadugang sa problema sa komunidad.

Gipadayag ni Garganera nga kong adunay laing lokal nga kagamhanan nga modawat sa basura sa siyudad, adunay responsibilidad ang siyudad sa pagsiguro nga ang maong pasilidad dili ma-expose sa dili angay nga risgo sa panglawas.

Ang resulta sa evaluation ug ang mga rekomendasyon gikan sa ocular inspection mahimong basehan kong kinsa ang makadaog sa bidding.

Naumol ang resolusyon ni Garganera tungod kay nangandam ang siyudad alang sa sunod nga bidding process sa garbage disposal services kong mapupos na ang kontrata ngadto sa Lungsod sa Aloguinsan.

Tumong usab ni Garganera nga masiguro ang bisan unsa’ng pasilidad nga pilion adunay igo nga kapasidad ug dili na mabalik ang nahitabong trash slide niadtong Enero 2026.

Ang resolusyon gi-refer una ngadto sa vice chairman sa Committee on Environment ug Committee on Laws, Styling and Ordinances.

Karon nga nalibkas na sa Department of Environment and Natural Resources-Environmental Management Bureau ang cease-and-desist order batok sa Prime Integrated Waste Solutions, Inc. (PWS), nagtakda usab og executive session ang konsehal karong Septiyembre 8, 2026 nga kinahanglan nga tambongan sa PWS, CCENRO, OBO, CCDRRMO, DENR-EMB aron matuki ang pagpahigayon og ocular inspection ug ang teknikalidad aron nga mamahimong makapahigayon og luwas nga operasyon bisan pa nga gipadayon ang rehabilitasyon sa Binaliw. (BANAT NEWS)