Jinggoy dinala sa ospital, lumagutok tuhod
MANILA, Philippines — Dinala si detained Senator Jinggoy Estrada sa Cardinal Santos Medical Center sa San Juan nitong Miyerkules para sa nakatakdang X-ray, ngunit nagsilbi rin itong pagkakataon para mabigyan siya ng atensyong medikal dahil sa matinding pananakit ng kaliwang tuhod.
Ayon sa kanyang kampo, “snapped” ang kaliwang tuhod ni Estrada habang nasa loob ng Quezon City Jail at naghahanda para sa medical procedure.
Itinanggi naman ng BJMP na nadulas si Estrada sa banyo ng kulungan. Paliwanag ni BJMP spokesperson JSupt. Jayrex Bustinera, naglalakad palabas ng selda si Estrada nang marinig ang “snap” mula sa kanyang tuhod.
Pinayagan ng Sandiganbayan 5th Division si Estrada na makalabas ng Quezon City Jail alas-11 ng umaga para sa X-ray ng tuhod sa Cardinal Santos alas-1 ng hapon.
Ang 63-anyos na senador ay matagal nang nakararanas ng joint effusion at paminsan-minsang pananakit sa parehong tuhod. Na-diagnose na rin siya ng osteoarthritis, isang degenerative na kondisyon na nakaaapekto sa kanyang paggalaw.
“Accused Estrada has of late been experiencing a flare up of persistent pain in both knees, making it acutely difficult for him to walk,” ayon sa Sandiganbayan.
Ipinabatid ng kanyang asawa ang kondisyon kay orthopedic doctor Dr. Jose Fernando Syquia, na nagrekomenda ng X-ray procedure sa parehong tuhod na may apat na specific views upang matukoy kung lumala na ang sakit ni Estrada.
- Latest
