Upat pa ka real estate developers ang nakasumiti og flood control mitigation

CEBU, Philippines — Upat pa ka real estate developers sa Dakbayan sa Sugbo ang nakasumite og flood mitigation ug detention pond plans isip tubag sa suwat nga gipadala gikan sa buhatan ni Mayor Nestor Archival, Sr. aron masusi kong aduna ba’y natampo nga pagbaha sa ubos nga mga lugar sa siyudad tungod sa mga kalamboan sa bukid.

Matud ni Kenneth Siasar, tigpamaba ug chief of staff ni Archival nga nimando si Archival sa Department of Engineering and Public Works (DEPW) nga mopadala og suwat ngadto sa tanang 65 ka developers sa habagatang distrito diin ang gikatada nga deadline niadtong Agosto 20, 2026. Gibutyag ni Siasar nga tulo lang ang nakasumite sa wala pa ang deadline nga gilangkuban sa La Paloma, Monterrazas ug Amari Residences.

Apan nadugangan og usa ka developer tungod kay niapas og sumite ang AppleOne niadtong Agosto 24, 2026.

Ang tanang nasumite nga mga plano ipaubos og inspeksiyon karong Agosto 27.

Tumong sa pagpangayo og flood control measures aron masuta kong igo ba ang kapasidad sa detention ponds ug water catchment facilities aron mapugngan ang pagbaha sa siyudad.

Tan-awon usab sa siyudad kong asa mopadulong ang tubig uwan ilabi na sa bukirang bahin nga gipangsemento na tungod sa kalamboan.

Gipasabot usab ni Siasar nga ang pagsumite og plano mao ang pagsuta kong nagtakdo ba ang plano ug ang actual nga nahimo sa matag proyekto.

Gibutyag usab ni Siasar nga adunay pipila ka developers nga nangayo og dugang panahon sa pagsumite sa ilang dokumento.

Apan ang mga dili makasumite, ang City Legal Office na ang mopadala og suwat ug posible nga pahamtangan og silot tungod kay wala kini nituman sa gipangayong dokumento sa mayor. BDB BANAT NEWS