Brownlee nayayay pa, dili moduwa sa Gilas
CEBU, Philippines — Morag napiangan na daan ang Gilas Pilipinas upat ka adlaw sa dili pa nila sangkaon ang Jordan sa umaabot nga window sa FIBA World Cup qualifiers.
Kini tungod kay dili makaduwa uban sa Gilas ang alas nilang si Justine Brownlee.
Mismo si coach Tim Cone ang mipahibawo sa dili maayong balita. Matud pa ni Cone nga dili makapakita'g aksiyon ang sinaligan nilang naturalized player tungod sa isyu niini sa panglawas.
Ang 38-anyos nga si Brownlee gihamok nang daan sa hamstring injury niadto pang playoffs sa PBA Commissioner’s Cup.
Nasamotan ang injury ni Brownlee sa dihang miduwa siya sa Gilas batok sa New Zealand sa miaging window didto sa Auckland.
“The big elephant in the room right now is that Justin is not here and will most likely not play. So we’ll be going without Justin,” matud pa ni Cone. “And that’s a big adjustment.”
Si Brownlee gikatakda untang maabot sa nasud niadtong Domingo apan dili na kini mahitabo.
Wala bisan anino sa Barangay Ginebra import ang mipatim-aw sa ilang praktis didto sa pasilidad sa San Miguel Corporation.
“He at this point doesn’t feel like he’s healthy enough to contribute. Whether that’s injury or health, he was having some issues obviously as we know from the last window,” dugang pa ni Cone. Sa pagka karon, ang Gilas anaa sa ikalimang dapit sa Group E uban ang 2-4 rekord.
Human nila harongon ang Jordan karong Biyernes didto sa SM Mall of Asia Arena sa Pasay City, ang Gilas mosakbang sunod batok sa Iran karong Domingo.
- Latest
