Gwen Garcia walay gipadayag nga plano sa 2028 elections

CEBU, Philippines — Nagpabiling hilom si kanhi Cebu Governor Gwendolyn Garcia bahin sa iyang politikal nga mga plano alang sa 2028 elections.

Hinuon miingon nga mas gusto niyang ipunting ang iyang panahon sa paghatag og mga oportunidad sa edukasyon ug panginabuhian pinaagi sa GFG Assessment & Training Center Corp. ug GFG Institute kaysa mag-apil sa sayo nga pag-andam alang sa politika.

Gipahayag kini ni Garcia sa dihang gipangutana sa mga tigbalita bahin sa posibilidad nga iyang iendorso ang Ako Bisaya Party-list Rep. Sonny Lagon ug sa posibleng pagdagan sa iyang igsoon nga si kanhi Cebu 3rd District Rep. Pablo John “PJ” Garcia alang sa pagka-gobernador sa 2028.

Mahitungod kang Lagon, mipahayag si Garcia sa iyang pagpasalamat sa suporta sa kongresista ug nahinumdom nga gipahulam siya niini og helicopter atol sa iyang pagbisita sa Ormoc.

“I have to be thankful to Sonny actually. He’s been very, very supportive. When I visited Ormoc, gipahuwam niya sa town ko sa iyang chopper,” matud ni Garcia.

“No comment” usab ang iyang tubag bahin sa gikataho nga plano sa iyang igsoon nga modagan alang sa maong posisyon.

Matod niya, dili produktibo nga maggahin siya og panahon sa politikal nga positioning samtang adunay mas dinaliang mga isyu nga nagkinahanglan og pagtagad.

Imbis politika, mas gusto ni Garcia nga ipunting ang iyang pagtagad sa paghatag sa mga tawo og mga kapilian nga makatabang sa pagpauswag sa ilang kinabuhi ug edukasyon.

Iyang gipadayon ang paghatag og prayoridad sa mga butang nga mahimo karon, ilabina sa mga kalisdanan nga giatubang sa daghang Cebuano.

Matod ni Garcia, sa pagkakaron nakapokus siya sa GFG Institute, lakip na ang pag-andam sa curriculum ug mga dokumento niini, ingon man ang pakigmiting sa mga potensyal nga trainers ug program heads.

Ang GFG Assessment & Training Center Corp. usa ka TESDA-registered training and assessment center nga gitukod ni Garcia. Kini nagpunting sa technical-vocational training ug competency assessment, ilabina sa digital ug emerging technology skills nga may kalabotan sa IT, BPO, digital services ug technology sectors, imbis nga tawgon lamang kini nga ordinaryong vocational school. (BANAT NEWS)