Super Health Center sa Labangon walay building permit

CEBU, Philippines — Wala pa gihapon napahimuslan sa kagamhanan sa Dakbayan sa Sugbo ang P9.9 milyones nga Super Health Center sa Barangay Labangon tungod kay wala kini building permit ug kuwang ang mga dokumento sa pagtukod bisan og kapin sa usa ka tuig na kini nga gi-turnover gikan sa Department of Health (DOH).

Ang maong Super Health Center gilaoman nga mahimong tunga-tungang pasilidad sa pag-atiman og mga pasyente sa barangay health center ug sa Cebu City Medical Center (CCMC) sama sa Super Health Center nga anaa sa amihanang distrito nga nahimutang sa Barangay Apas.

Gi-turnover ang Super Health Center sa Barangay Labangon niadtong 2025 ubos sa administrasyon ni kanhi mayor Raymond Alvin Garcia apan nasayran sa kasamtangang administrasyon nga wala pa kini madawat sa kagamhanan sa siyudad.

Si Kenneth Siasar, tigpamaba ni Mayor Nestor Archival, Sr. nibutyag nga daghang kuwang nga dokumento ang maong pasilidad human kini gisusi ni Archival.

 Matud ni Siasar nga gawas sa building permit, wala usab kini construction permits ug dokumentasyon nga angay unta nga gisiguro dihang gitukod ang pasilidad.

Gipasa na ni Archival ngadto sa City Legal Office ang pag-atiman sa mga dokumento aron usab nga masuta kong unsaon pagdawat niini gikan sa DOH ug aron nga magamit ang pasilidad bisan pa og kuwang ang mga papeles.

Kinahanglan usab nga adunay legal nga opinyon gikan sa City Legal aron masayod ang kagamhanan sa siyudad sa angayan nga buhaton aron mabayaran usab ang contractor sa DOH.

Gibutyag usab ni Siasar nga ang luna nga gipanag-iya sa kagamhanan ug usa sa pinakadakong babag mao nga wala pa kini hingpit nga madawat tungod kay wala kini certificate of occupancy nga kinahanglang ipagawas sa Office of the Building Official (OBO).

Ang mga tigbalita nisuway sa pagkuha og habig gikan sa OBO apan wala kini motubag.

Matud ni Siasar nga ang DOH maoy naghatag sa pundo, contractor ug materiyales sa proyekto samtang ang kagamhanan sa siyudad maoy responsable sa pagproseso sa mga permit ug uban pa’ng dokumento.

Samtang giatiman ang papeles sa maong pasilidad, si Siasar nagkanayon nga gusto ni Archival nga magsugod na ang operasyon sa Labangon Super Health Center aron makatabang sa pagpagaan sa gidaghanon sa mga pasyente sa barangay health center ug sa CCMC. (BANAT NEWS)