Grupo sanib-pwersa kontra LPG cylinder swapping center operational guidelines

MANILA, Philippines — Sumugod sa Department of Energy (DOE) ang ilang grupo ng liquified petroleum gas (LPG) industries upang harangin ang pagpapatupad ng inaprubahang LPG Cylinder Swapping Center Operational Guidelines, nitong Martes, Agosto 25.

Kabilang sa nagsanib-pwersa ang National LPG Alliance of the Philippines, Inc. o NLAP, Pryce Gases, Inc. (PGI), at Independent LPG Dealers Association of the Philippines (ILDAP), na nagsumite ng Joint Position Paper sa DOE, at Department of Trade and Industry (DTI).

Giit nila, walang sapat na legal na batayan ang guidelines lalo’t wala pang nabubuo at nailalathalang programa para sa LPG Cylinder Exchange and Swapping Program at LPG Cylinder Improvement Program, na nakasaad sa ilalim ng Sections 31 at 32 ng Republic Act No. 11592.

Kabilang dapat, anila, sa programa ang mga procedures, timelines para sa exchange, swapping at buyback ng LPG cylinders; mekanismo sa accredited LPG cylinder swapping centers; at pagbuo, funding, utilization, access at audit procedures para sa LPG Cylinder Improvement Program Fund.

Hindi rin umano naikonsulta sa LPG industries, consumer groups at iba pang pampubliko at pribadong stakeholders na kinabibilangan ng Philippine Competition Commission, DTI Consumer Protection and Advocacy Bureau, Department of the Interior and Local Government, local government units at Bureau of Fire Protection.

Ayon kay NLAP President Jojo Cruz, dapat na sumunod sa itinatakda ng batas upang matiyak na malinaw at magkakatugma muna ang lahat ng detalye, para sa kapakanan hindi lamang ng industriya ng LPG kundi maging ng mga end-consumesr.

Ipinabubuwag din nila ang National Program Policy Task Force (NPPTF) at Regional Program Implementation Task Force (RPITF) na hindi dapat magsilbing policy-making body,alinsunod sa Sections 31 at 32 ng RA 11592  na tumulong lamang sa pagpapatupad ng programa.

Dapat anila, na maging pangunahing prayoridad ang kaligtasan ng LPG cylinder at proteksyon ng lahat ng end consumers,

Sinabi rin ng mga grupo na mapanlinlang ang pahayag na matagal nang dapat ipatupad ang LPG Cylinder Swapping Guidelines mula 2022 hanggang 2026, dahil hindi pa naman maayos na nabubuo at nailalathala o napa publish ang mismong mga programang ipinag-uutos ng batas.