Armas sa 14-anyos gipasubay kinsay tag-iya

CEBU, Philippines — Gipadayon sa Philippine National Police (PNP) ang pag-verify kung kang kinsa ang .357 revolver nga nasakpang gidala-dala sa usa ka 14-anyos nga tinun-an sulod sa iyang school bag sulod sa ilang eskuylahan sa Pinamungajan, Cebu.

Sa pahayag nga gipagawas niadtong Biyernes sa gabii, Agosto 20, gikumpirma ni PGen. Jose Melencio Nartatez Jr. ang pagkarekober sa pusil atol sa routine inspection sa eskwelahan.

Nangayo dayon og tabang sa kapulisan ang mga opisyal sa eskwelahan human nadiskubrehan ang armas sulod sa bag sa menor de edad.

Sumala sa PNP, walay bala ang pusil sa dihang nakit-an kini ug anaa na karon sa kustodiya sa kapulisan.

Una nang gibutyag sa bata ngadto sa mga otoridad nga gikan kadto sa cabinet sa iyahang apohan.

Apan bisan pa ani, padayon pang gisubay sa kapolisan kung kang kinsa ba gyud kini ug kun nganong naa silay armas ug kung giunsa man pagpasulod niya sa armas nga unta gipahugtan naman ang mga seguridad tungod sa mga nahitabong pagpamusil sa sulod sa mga eskuylahan sa nangaging mga adlaw.

Matud ni Nartatez ilaha pang sutaon kun duna bay tulobagon ang bata ug kun kinsa ang angay manubag sa nahitabo.

Subay sa Republic Act No. 9344 o Juvenile Justice and Welfare Act, gitugyan ang menor de edad ngadto sa Municipal Social Welfare and Development Office alang sa hustong intervention.

Gidayeg usab ni Nartatez ang pagkaalerto sa mga personnel sa eskwelahan ug ang ilang dali nga pagpakigkoordinar sa mga awtoridad human nakit-an ang armas.

Matud pa sa PNP, magpadayon kini sa pakigtambayayong sa mga eskwelahan, pamilya ug komunidad aron mapadayon ang luwas nga palibot sa pagkat-on samtang gipanalipdan ang mga katungod ug kaayohan sa mga bata. — /IBM (BANAT NEWS)