Eala wala mag-usik og oras sa iyang preparasyon

CEBU, Philippines — Usa ka adlaw human siya mitugpa sa New York, gisugdan dayon ni Pinay tennis star Alex Eala ang iyang pagpangandam alang sa US Open.

Ang katapusang Grand Slam event ni Eala karong tuiga ipahigayon gikan sa Agosto 30 ngadto sa Septiembre 13 didto sa Billie Jean King National Tennis Center sa Flushing Meadows-Corona Park sa Queens, New York.

Kagahapong adlawa, ang 21-anyos nga si Eala nakit-an nga nag-training didto sa Arthur Ashe Stadium, ang kinadak-an nga tennis stadium sa kalibutan.

Ang Pinay world No.20 gipaabot nga mamahimong usa ka seeded player sa torneyo.

Impresibo kaayo ang salida ni Eala ning tuiga.

Pito na ka Top 10 players ang iyang gipildi ug mikatkat siya sa labing nindot nga puwesto sa WTA rankings sa iyang karera nga lagmit mosaka pa siya ngadto sa No.18 inig ka human sa nagpadayong Cincinnati Open.

Ang main draw sa US Open mahibaw-an sud ning semanaha.

Si Eala mikulit sa una niyang daog sa usa ka Grand Slam sa US Open sa miaging tuig human gibuntog niya si Clara Tauson sa tulo ka sets. Apan gitagak siya sa ikaduhang hugna ni Cristina Bucsa.

Ning higayona, lahi nga kasaysayan ang tuyo ni Eala. Maong angayan atngan kon makab-ot ba kini niya.