15-anyos inaresto sa bantang pamamaril, grenade attack sa iskul

MANILA, Philippines — Isang 15-anyos na binatilyo ang inaresto ng mga otoridad na hinihinalang nasa likod ng pagpapakalat sa social media sa banta nitong pamamaril at pagpapasabog ng granada sa pribadong secondary schools sa Valencia City, Bukidnon, ayon sa ulat kahapon.

Sa report ng Valencia City Police, alas-7:51 ng gabi nitong Sabado nang masakote ang suspect sa lungsod.

Lumalabas sa imbestigasyon noong Lunes ay nagposte sa social media ang binatilyo na magpapasabog umano ng granada at mamamaril sa mga estudyante sa private secondary schools sa lungsod.

Dahil dito ay mabilis na nagsagawa ng imbestigasyon ang mga otoridad na natunton ang kinaroroonan ng bata na isinailalim sa kustodya ng City Social Welfare and Development (CSWD).