74-anyos puganteng Kano huli ng BI
MANILA, Philippines — Arestado ang 74-anyos na American national ng mga ahente ng BI Fugitive Search Unit (FSU), sa pakikipag-ugnayan sa US Department of State’s Diplomatic Security Service–Overseas Criminal Investigations (DSS-OCI) at sa PNP Criminal Investigation and Detection Group–Child Protection Force Unit (CIDG-CPFU) sa Tanza, Cavite noong Martes.
Natunton ang banyagang si William Joseph Sullivan, sa isang residential area sa Barangay Paradahan I, sa isinagawang enforcement operation madaling araw ng Agosto 19.
Si Sullivan ay wanted sa Estados Unidos dahil sa paglabag sa kondisyon ng kanyang supervised release, na may kaugnayan sa kasong Criminal Sexual Conduct.
Humingi ng tulong ang mga awtoridad ng US sa BI na hanapin at arestuhin si Sullivan matapos maglabas ng arrest warrant ang Minnesota Department of Corrections noong Abril 2026.
Batay sa rekord ng BI, dumating si Sullivan sa Pilipinas ngayong taon at pinayagang manatili bilang temporary visitor.
Sinabi ni Immigration Commissioner Joel Anthony Viado, ang operasyon ay naaayon sa kampanyang #ShieldKids ng BI, na naglalayong palakasin ang pagsisikap ng Kawanihan na protektahan ang mga bata at iba pang bulnerableng indibiduwal laban sa mga dayuhang sexual predator at iba pang maaaring pagsamantalahan ang Pilipinas bilang destinasyon ng mga kriminal na gawain.
- Latest
