Nisutoy bisag red light, nakabangga
CEBU, Philippines — Kritikal ang kahimtang sa usa ka 59-anyos nga motorcycle rider human giingong nilabang sa red light ug nabangga sa laing motorsiklo sa intersection sa P. Del Rosario ug Junquera Streets sa Barangay San Antonio, Cebu City, alas 8:58 sa gabii niadtong Biyernes, Agosto 21, 2026.
Giila ang rider nga si Segundo Butaya, 59, residente sa Catarman, Liloan, nga nagmaneho sa Honda Click ug gidala sa Cebu City Medical Center (CCMC) human nakaplagang wala’y panimuot.
Naangol usab ang iyang 18-anyos nga back rider nga si Warren Tudlas nga taga Ginatilan. Minor injuries usab ang naangkon ni Richard Gabrillo, 50, residente sa Sitio Ipil, Barangay Basak San Nicolas, nga nagmaneho sa Yamaha Mio nga nabanggaan ni Butaya.
Base sa imbestigasyon sa Traffic Enforcement Unit sa Cebu City Police Office ug sa footage gikan sa Eagle Eye sa Cebu City Government, mihunong una ang gimanehong motorsiklo ni Gabrillo tungod kay pula ang traffic signal sa Junquera Street paingon sa downtown area.
Sa pag go signal niabante na si Gabrillo apan giingon kalit nga nibutho si Butaya nga kusog ang dagan bisan pula pa ang traffic signal gikan sa P. Del Rosario Street paingon sa habagatang direksyon hinungdan nga nabangga niya ang motorsiklo ni Gabrillo. Tungod sa kusog sa pagbangga, nangatumba ang duha ka motorsiklo ug nangalabay sa sementadong dalan ang ilang mga nagmaneho.
Pag-abot sa mga medical personnel sa Cebu City Disaster Risk Reduction and Management Office, wala na’y panimuot si Butaya ug gidala dayun sa CCMC. (BANAT NEWS)
- Latest
