Dakong sinkhole nitumaw sa Bogo

CEBU, Philippines — Usa ka sinkhole nga mokabat og 15 hangtod 16 metros ang gilapdon sa baba ang nadiskubrehan sa Purok Indolencio, Barangay Guadalupe, Bogo City, ug kini na ang ika-20 nga sinkhole nga na-record sa siyudad ug pinakadako sa pagkakaron.

Gi-report ang sinkhole alas-5 sa buntag niadtong Agosto 20 ngadto sa Bogo City Disaster Risk Reduction and Management Office (CDRRMO) pinaagi sa barangay secretary sa Guadalupe.

Dali usab nga miresponde ang CDRRMO aron susihon ug bantayan ang kahimtang sa maong lugar.

Matud ni Bogo City Public Information Officer Jeany Eve Ynot, gilimitahan na ang pagsulod sa lugar ug gi-cordon kini og 20 metros gikan sa sinkhole isip unang safety precaution.

“Initial nga precautionary measure is gi cordon off nato ang area – 20 meters from the sinkhole,” matud pa niya.

Gi-deploy usab ang mga barangay tanod pinaagi sa shifting aron mabantayan ang lugar ug mapugngan ang mga tawo nga molapas sa caution tape dungan sa pagpahibalo sa mga residente sa mga gidili buhaton ug kung adunay makita nga kausaban sa palibot.

Gitan-aw usab sa city government kung adunay posibleng kalambigitan ang sinkhole sa magnitude 6.9 nga linog nga mitay-og sa northern Cebu niadtong Septiyembre 2025.

Apan, matud pang Ynot nga wala pa ni nakumpirmar sa Mines and Geosciences Bureau (MGB) nga gilauman nga mopadala og technical team sa lugar karong adlawa Agosto 22.

“We are to expect man jud (on sinkholes) kay since there was big movement last year possible jud nga naay mga hollow areas sa yuta nga na develop.”

Adunay tulo ka balay duol sa sinkhole apan wala kini masulod sa 20-meter setback nga gipatuman sa siyudad. Usa lamang sa tulo ka balay ang adunay nagpuyo nga gipabalhin unya sa didto sa ilang paryente.

Sumala sa Bogo CDRRMO head Rex Leoben Ygot, ang sinkhole mokabat og 15 hangtod 16 metros ang gilapdon apan wala pa matino ang giladmon niini.

Gitan-aw usab sa mga otoridad ang giingong tubig ilawom sa sinkhole.  Gidid-an ang mga residente sa paglabay og basura, yuta, bato o debris kay basin dunay mahitabong kontaminasyon ug makabara sa underground channels.

Matud sa city government, ang maong lugar nahimutang sa medyo bukiron nga bahin sa Guadalupe, layo sa dagat, poblacion ug main barangay road.

Kinahanglan pa nga susihon sa mga geologist ang tukmang hinungdan, giladmon, underground extent ug kondisyon sa yuta.

Ang Mayor sa Bogo nga si Maria Cielo Martinez miingon nga padayon ang koordinasyon sa barangay ug MGB aron mahibaw-an ang findings ug technical recommendations bahin sa sinkhole.

“Atoang gihangyo ang tanan to cooperate kay safety is our priority. Amping ang tanan,” matud pa sa mayor.—  IBM BANAT NEWS