Bag-ong guidelines sa LWUA maghatag og proteksyon sa mga konsumidor

CEBU, Philippines — Nakakuha na si Cebu City Councilor Harold Go og pasalig gikan sa Local Water Utilities Administration (LWUA) ug sa Metropolitan Cebu Water District (MCWD) nga mahatagan og proteksyon ang mga konsumidor ubos sa bag-ong guidelines nga giluwatan sa LWUA bahin sa dugay nga water supply interruptions.

Sa pagkakaron si Go nagtinguha nga mahatagan og refunds, o ba kaha bill credits, ang mga households nga nahatagan og bill bisan og way agas ang ilang tubig.

Atol sa press conference kagahapon, gitug-an ni Go nga nakadawat siya og daghang reklamo gikan sa mga residente nga gipabayad gihapon og minimum fees bisan og pipila ka semana nga nakasinate ug way agas sa tubig.

Gilakbit ni Go ang iyang giduso nga resolusyon niadtong buwan sa Enero nga naghangyo sa MCWD nga ma waive ang minimum charges panahon sa service failures.

Apan ang MCWD nitubag niadtong buwan sa Marso nga dili na mausab ang minimum charge tungod kay kabahin na kini sa ilang polisiya.

 “I was not satisfied with that answer because there is a higher law—you cannot charge for services not rendered. That is unfair. Their policy is not the law,” suma pa ni Go.

Si Go nakigtagbo niadtong miaging semana kang LWUA Administrator Jose Moises P. Salonga.

Gitug-an ni Salonga nga ang LWUA ni isyu na og Memorandum Circular No. 009-25 sa Disyembre 2025, nga giulohan og “Guidelines for Local Water Districts Regarding Water Supply Interruptions.”

Ang maong circular nagdili sa disconnection sa mga accounts nga wa makabayad sa ilang bill kun nakasinate kini og way agas sa tubig sulod sa kinse ka adlaw o mas madugay pa ug gidili usab ang pagpatuman sa minimum charges sa mao gihapon nga kondisyon. Suma pa ni Go nga ang maong kamanduan sa LWUA nakahatag na og tubag sa reklamo sa mga Cebuano consumers.

Nakigtagbo na usab siya ni MCWD Chairman Ruben Almendras ug sa iyang team, kinsa mikompirmar nga nakadawat sa maong circular, ug nipasalig nga motuman sa maong direktiba. (BANAT NEWS)